माओवाद्यांच्या हल्ल्यात अधिकाऱ्यासह बीएसएफचे चार जवान शहीद

कांकेर : छत्तीसगडमध्ये कांकेर जिल्ह्यात सुरक्षादलाचे जवान आणि माओवाद्यांमध्ये चकमक सुरू आहे. या चकमकीदरम्यान एका अधिकाऱ्यासह बीएसएफचे चार जवान शहीद झाले आहेत. तसेच आणखी दोन जवान जखमी झाल्याची माहिती समोर आली आहे. जखमी जवानांना हॉस्पिटलमध्ये दाखल करण्यात आले आहे.

लोकसभा निवडणुकीवर माओवाद्यांकडून बहिष्कार घालण्यात आल्याने सर्वत्र जवानांचे कोम्बिंग ऑपरेशन सुरू आहे. सीमा सुरक्षादलाचे जवान कोम्बिंग ऑपरेशन करत असताच माओवाद्यांनी जवानांवर भ्याड हल्ला केला. यानंतर जवान आणि माओवाद्यांमध्ये चकमक सुरू झाली.

माओवाद्यांना प्रत्युत्तर देत असताना चार जवान हुतात्मा झाले. पखांजूर येथील प्रतापपूर पोलिस स्टेशन अंतर्गत येणाऱ्या मोहल्ला जंगल परिसरात माओवादी आणि जवानांमध्ये ही चकमक उडाली. चकमकीबाबतची माहिती मिळताच घटनास्थळी अतिरिक्त कुमक पाठवण्यात आली. आताही परिसरात चकमक सुरू असल्याची माहिती समोर आली आहे.

Web Title: 4 BSF jawans killed in encounter with Naxals in Chhattisgarh