नवी मुंबई विमानतळासाठी ५७७ झाडांचा बळी

सिडकोच्या हद्दीतील विमानतळ-६ या ठिकाणी पायाभूत सुविधांच्या विकासकामात ५७७ झाडे अडथळा निर्माण करत आहेत त्यामुळे ही झाडे तोडण्यासाठी सिडकोने उद्यान विभागाकडे परवानगी मागितली आहे. मात्र ही झाडे तोडण्याची परवानगी देण्याआधी हरकती किंवा काही सूचना असतील तर त्या संबंधित नागरिकांनी सिडकोकडे कळवाव्यात, असे आवाहन सिडकोने केले आहे. या सूचना, हरकती सात दिवसांपर्यंत म्हणजे पुढच्या शनिवारपर्यंत, सिडको, उद्यान विभाग, आठवा मजला, रायगड भवन, सीबीडी बेलापूर या ठिकाणी नोंदवायच्या आहेत. कुणीही हरकत न घेतल्यास संबंधितांना ही झाडे तोडण्याची परवानगी दिली जाईल, असे उद्यान विभागाने स्पष्ट केले आहे. त्यामुळे या भागातील आणखी ५७७ झाडांची तोड जवळपास निश्चित झाली आहे. आतापर्यंत या विमानतळ क्षेत्रातील हिरवळ जवळ जवळ नष्टच झाली आहे. अनेक झाडे झुडपे भरावाखाली, टेकड्यांच्या सपाटीकरणात गेली आहेत. आता उरलेला हा हिरवळीचा पट्टाही आता नष्ट होण्याच्या मार्गावर आहे.

प्रस्तावित नवी मुंबई आंतरराष्ट्रीय विमानतळासाठी टेकड्या फोडून, भराव टाकून जमीन सपाटीकरणाचे काम केले जात आहे. यामध्ये आता पर्यंत अनेक झाडांचा बळी गेला आहे. त्यावरील प्राणी, पक्षी बेघर झाले आहेत. अनेक ठिकाणी खारफुटीवरही भराव टाकण्यात आला आहे. या खारफुटीची दुसऱ्या ठिकाणी लागवड केली जाणार असल्याचेही सिडकोने स्पष्ट केले आहे. आता नवी मुंबई आंतरराष्ट्रीय विमानतळाच्या दक्षिणेकडील बंबाची पाडा आणि वरचा ओवळा हद्दीत प्रस्तावित पुष्पक नोड विकसित होत आहे. मात्र या कामासाठी इथे असणाऱ्या ५७७ झाडांचा अडथळा ठरत आहे. त्यामुळे ही झाडे सिडकोकडून तोडली जाणार आहेत.

Web Title 577 more trees will cut for navi mumbai airport by cidco