Cotton Price Per Quintal : कापसाचा दर वाढला, उत्पादकांत चैतन्य; जाणून घ्या प्रतिक्विंटलला मिळणारा भाव

गत काही दिवसांपूर्वी कापसाच्या (cotton) दरात घसरण झाल्याने भाव ७ हजार ते ८ हजार रुपये प्रतिक्विंटलवर पोहोचले होते. त्यानंतर कापसाचा बाजार स्थिरावला होता. आता पुन्हा पांढऱ्या सोन्याने ९ हजारांचा टप्पा गाठला आहे. (Maharashtra News)

अकोल्यातील अकोट (akot) बाजार समितीत कापसाला ९ हजार ७० रुपये प्रतिक्विंटल दर मिळाला. तसेच बाजार समितीत आवकही वाढल्याचे चित्र दिसून आले. आगामी काही दिवसात पुन्हा कापसाचे दर वाढण्याची शक्यता वर्तविण्यात आली आहे.

कापसाचा हंगाम ऑक्टोबरपासून सुरू झाला आहे. परतीच्या पावसामुळे हंगाम लांबला आहे. दिवाळीपर्यंत (diwali) कापसाचे दर कमी होते. हंगामाच्या प्रारंभी काही दिवस कापसाचे बाजारभाव प्रतिक्विंटल ७ हजार ते ८ हजार रुपयांच्या घरात होते.

आता पुन्हा कापसाचा (cotton) दरात किंचित वाढ झाली असून, ९ हजार रुपयांचा टप्पा कापसाने गाठला आहे. गेल्या चार दिवसांमध्ये कापसाच्या दरात २००-३०० रुपयांची क्विंटलमागे वाढ झाल्याचे दिसून येत आहे.

Edited By : Siddharth Latkar