Rajat Patidar IPL 2022 : लिलावात होता अनसोल्ड, बदली खेळाडू म्हणून आला अन् केलं संधीचं सोनं

इंडियन प्रमियर लीगच्या (IPL) २०२२ च्या एलिमिनेटर सामन्यात रॉयल चॅलेंजर्स बॅंगलोरचा फलंदाज रजत पाटीदारने चमकदार कामगिरी केलीय. पाटीदारने आरसीबीसाठी मोक्याच्या क्षणी ५४ चेंडूत ११२ धावांची आक्रमक खेळी केली. त्यामुळेच आरसीबीचा संघ दोनशे धावांचा टप्पा पार करु शकला.

रजन पाटीदारने लखनऊच्या गोलंदाजांचा धुव्वा उडवत ११२ धावांचं दमदार शतक ठोकलं. या खेळीत रजतने १२ चौकार आणि ७ षटकार ठोकले. २०० हून अधिकच्या स्ट्राईक रेटने पाटीदारने त्याच्या आयपीएलमधील पहिलं शतक केलं.

रजत पाटीदारने शतक ठोकून विक्रमी खेळी केली. आयपीएलच्या यंदाच्या हंगामात जेवढे शतक केले, यामध्ये पाटीदारने केलेलं शतक हे सर्वाधिक वेगवान खेळीचं शतक आहे. पाटीदारने ४९ चेंडूत धडाकेबाज फलंदाजी करत १०० धावा कुटल्या.

रजत पाटीदारचाही आयपीएलच्या प्ले ऑफमध्ये शतक करण्याच्या यादीत समावेश झाला आहे. यामध्ये विरेंद्र सेहवाग, शेन वॉटसन, रिद्धीमान साहा, मुरली विजय यांच्याही नावाचा समावेश आहे.

अनकॅप प्लेयर्सबद्दल बोलायचं झालं तर रजत पाटीदारचाही यामध्ये समावेश आहे. पाटीदार चौथा अनकॅप प्लेयर आहे, ज्यानं आयपीएलमध्ये शतक करण्यची अप्रतिम कामगिरी केली आहे. यापूर्वी पॉल वल्थाटी, मनीष पांडे, देवदत्त पडिक्कल यांनीही अशीच चमकदार कामगिरी केलीय.

रजत पाटीदार मूळचा मध्य प्रदेशचा आहे. यंदाच्या आयपीएलच्या लिलावात पाटीदार अनसोल्ड झाला होता. कोणत्याच संघांना त्याच्यावर बोली लावली नव्हती. त्यानंतर आरसीबीनेअनफीट असलेल्या एका खेळाडूला रिप्लेस करत २० लाखांमध्ये रजत पाटीदारला घेतलं.