Brahmastra : बॉयकॉट ट्रेंडमध्येही ब्रम्हास्त्र चालला! दुसऱ्याचं दिवशी १०० कोटी क्लबमध्ये समावेश

मुंबई : बॉलिवूड अभिनेता रणबीर कपूर(Ranbir Kapoor) आणि अभिनेत्री आलिया भट्ट यांच्या'ब्रह्मास्त्र' (Brahmastra) या चित्रपटाच्या रिलीजला दोन दिवस पूर्ण झाले आहेत. चित्रपटाला सुरुवातीला बायकॉट ट्रेंडला सामोरे जावे लागले. पण हा चित्रपट त्याच्या शीर्षकाप्रमाणेच बॉलिवूडचा ब्रह्मास्त्र म्हणून उदयास आला. या चित्रपटाने अवघ्या दोन दिवसात चांगलीच कमाई केली आहे. हा चित्रपट बॉलिवूडमधील आतापर्यंतचा बिग बजेट चित्रपट असून या चित्रपटाचे बजेट ४१० कोटी आहे. दिग्दर्शक अयान मुखर्जीच्या ११ वर्षांच्या मेहनतीचा परिणाम आता दिसून येत आहे. पहिल्याच दिवशी म्हणजे शुक्रवारी जगभरात ७५ कोटींचा टप्पा पार केला आहे. त्यामुळे या चित्रपटाने दुसऱ्या दिवशीही बऱ्यापैकी कमाई केली आहे.

ब्रह्मास्त्र या चित्रपटाने शनिवारी उत्तर भारत आणि गुजरातमध्ये चांगलीच कमाई केली. तर शुक्रवारी, सुमारे ३१ कोटींची कमाई फक्त हिंदीत झाली आणि अन्य भाषांमध्ये थोडीशी घसरण दिसून आली. आता दोन दिवसांच्या आकडेवारीनुसार, चित्रपटाने केवळ हिंदीमध्ये ३३ कोटींची कमाई केली आहे. तमिळ, तेलुगू, मल्याळम आणि कन्नड या इतर भाषांमध्ये ३७ कोटींचा गल्ला जमा केला आहेत.

जगभरातील कलेक्शनबद्दल बोलायचे तर पहिल्याच दिवशी म्हणजे शुक्रवारी ७६ कोटींची कमाई केली. तर रिलीजच्या दुसऱ्या दिवशी या सिनेमाने जगभरात ८५ कोटींची कमाई करत १०० कोटींचा आकडा पार केला आहे. आतापर्यंत फक्त दोन दिवसात १६० कोटींची कमाई करत या चित्रपटाने इतिहास रचला आहे.

आलिया आणि रणबीरचा चित्रपट रिलीज झाल्यापासून दोघेही आपल्या चाहत्यांना आणि प्रेक्षकांना तो पाहण्याची विनंती करत आहेत. या दोघांसाठी हा खूप खास क्षण आहे कारण दोघांनी काही महिन्यांपूर्वी लग्न केले आहे आणि आता लवकरच त्यांच्या पहिल्या मुलाचे स्वागत करण्यासाठी सज्ज आहेत. हा चित्रपट हिट होणं या दोघांसाठीही तितकंच महत्त्वाचं आहे. 'ब्रह्मास्त्र'साठी दिग्दर्शक, निर्मात्यांसोबत सगळेच प्रयत्न करत आहेत. बघूया चित्रपटाचे भविष्य किती उज्ज्वल आहे.