5 Years Of Raabta : सुशांतसिंहच्या आठवणींनी कृती सेनन भावुक, गायलं हे खास गाणं

मुंबई : दिवंगत अभिनेता सुशांत सिंह राजपूत (suhant singh rajput) आणि कृती सेननच्या 'राबता' या चित्रपटाला ५ वर्षे पूर्ण झाली आहेत. दिनेश विजनने हा चित्रपट (movie) दिग्दर्शित केला होता. हा चित्रपट ९ जून २०१७ रोजी प्रदर्शित झाला होता. या चित्रपटाशी अभिनेत्री कृती सेननच्या अनेक आठवणी जोडल्या गेल्या आहेत. १४ जून २०२० रोजी सुशांतचा मृत्यू झाला होता. कृती सेनन त्याच्यासोबतच्या आठवणींनी भावुक झाली आहे. तिने सोशल मीडियावर एक खास पोस्ट शेअर करून त्या आठवणींना उजाळा दिला.

कृती सेननने इंस्टाग्रामवर एक गाण्याचा व्हिडिओ शेअर केला आहे. हा व्हिडीओ दिग्दर्शक अमर कौशिक यांनी शूट केलेल्या 'भेडिया' चित्रपटाच्या सेटवरील असल्याचे दिसते आहे. या व्हिडिओमध्ये कृती सेनन 'राबता' हे गाणं गाताना दिसत आहे.

कृती म्हणाली, आठवणींनी भरलेला चित्रपट

दिवंगत अभिनेता सुशांत सिंह राजपूत आणि दिग्दर्शक दिनेश विजन यांच्यासाठी कृती सेननने इंस्टाग्राम अकाउंटवर एक भावनिक पोस्ट शेअर करून 'राबता'च्या संपूर्ण टीमचे आभार मानले आहेत. पोस्टखाली कृतीने 'मेहरबानी जाते जाते मुझपे कर गया, गुजरता सा लम्हा एक दामन में भर गया' या 'राबता' चित्रपटातील गाण्याच्या ओळी लिहिल्या आहेत. त्यात ती म्हणाली की, हे अनेक अर्थाने माझ्यासाठी खास आहे. आठवणींनी भारलेला राबता हा चित्रपट होता. माझ्या हृदयाच्या जवळचा प्रवास आणि तुम्हा दोघांसोबत काम करण्याची संधी मिळाली याचा मला आनंद आहे. सुशांत आणि दिनू. राबताची ५ वर्षे. ' माझ्या गाण्याकडे लक्ष देऊ नका, त्यामागील भावना शुद्ध आहे,' असंही तिनं पोस्टमध्ये म्हटलं आहे.

सुशांत सिंग राजपूतचे चाहतेही कृती सेननने पोस्ट केलेल्या या व्हिडिओचे कौतुक करत आहेत. सुशांतच्या अनेक चाहत्यांनी कृती सेननच्या या पोस्टवर कमेंट केली आहे. 'खूप सुंदर भेट तू सुशांतला दिली आहेस', अशी प्रतिक्रिया एका चाहत्यानं दिली. 'राबता हा खूप सुंदर चित्रपट आहे. त्यात तू आणि सुशांतने खूपच मस्त काम केलं आहे', असं एका चाहत्यानं म्हटलं आहे.

कृती सेननच्या कामाबद्दल बोलायचे झाले तर 'गणपत', 'शेहजादा', 'भेडिया' आणि 'आदीपुरुष' हे तिचे आगामी चित्रपट आहेत. तसेच कृती सेनन अनुराग कश्यपसोबतच्या एका चित्रपटातही काम करणार आहे, अशी माहिती मिळते.

Edited By - Shruti Kadam