Nagraj Manjule:नागराज मंजुळेंची मराठी चित्रपटातील नाळ तुटेना, लवकरच 'नाळ २' प्रेक्षकांच्या भेटीला

मुंबई : दिग्दर्शक नागराज मंजुळे (Nagraj Manjule) हे नाव उच्चारल्यावर डोळ्यासमोर चित्रपट येतात ते फॅन्ड्री, सैराट, नाळ, झूंड. या चारही चित्रपटांनी प्रेक्षकांच्या मनावर राज्य केले. नागराज मंजुळेच्या सर्वच चित्रपटांनी बॉक्स ऑफिसवर चांगलाच गल्ला जमवला होता. त्याच्या दमदार चित्रपटातील एक चित्रपट म्हणजे 'नाळ'. त्या चित्रपटात चैत्याची भूमिका श्रीनिवास पोकळे, चैत्याची आई म्हणजे देविका दफ्तरदार आणि चैत्याच्या वडिलांची भूमिका खुद्द नागराज मंजुळेनी साकारली होती. चित्रपटाचा शेवट अनेक अनुत्तरित प्रश्नांनी झाला होता. येत्या भागात त्या सर्व प्रश्नांची उत्तरे चित्रपटात मिळणार आहेत.

नागराज मंजुळाने सोशल मीडियावर एक पोस्ट शेअर करत 'नाळ २' चित्रपटाची घोषणा केली आहे. सोशल मीडियावर शेअर केलेल्या फोटोंमध्ये सुधाकर, नागराज, देविका व श्रीनिवास दिसत आहेत. या फोटोच्या कॅप्शनमध्ये ,'मागच्या महिन्यात सुधाकरने अचानक फोन करत सांगितला की, नाळचा दुसरा भाग लिहीला आहे. ऐकवायला कधी भेटुया? नाळच्या दुसऱ्या भागात काय होऊ शकते याबाबत मला खूप उत्सुकता होती. स्क्रिप्ट ऐकली ती इतकी अनपेक्षित तरीही सहज नि भारी होती की दोन महिन्यांच्या जय्यत तयारीनिशी फिल्मचं शूटिंग झटक्यात सुरू केले. पहिल्या "नाळ" प्रमाणेच 'नाळ'चा दुसरा भागही संस्मरणीय होईल अशी आशा आहे ! "नाळ 2" च्या नावानं चांगभलं !!! '

नागराजच्या या आगामी चित्रपटाने त्याचे चाहते नक्कीच आनंदीत आहेत. चित्रपटाच्या चित्रीकरणाला नुकतीच सुरुवात झाली आहे. त्यामुळे चित्रपटाच्या कथानकात प्रेक्षकांना काय पाहायला मिळणार हे पाहणे महत्वाचे ठरणार आहे.