मुंबई : बॉलिवूडचा सध्याचा सुपरस्टार कार्तिक आर्यन(Kartik Aaryan) आणि अभिनेत्री कियारा अडवाणी(Kiara Advani) यांच्या 'भूल भुलैया २' या चित्रपटाने चाहत्यांच्या मनात खास स्थान निर्माण केले आहे. दोन महिन्यांपूर्वी रिलीज झालेल्या या चित्रपटाने बॉक्स ऑफिसवर धमाल केली होती. या चित्रपटाला प्रेक्षकांचा चांगला प्रतिसाद मिळाला. या हॉरर-कॉमेडी चित्रपटात कियारा अडवाणी- कार्तिक आर्यनची लव्ह स्टोरी प्रेक्षकांना खूप आवडली होती. पण आता या चित्रपटाच्या तिसऱ्या भागात कियाराला रिप्लेस करण्यात आल्याचे वृत्त समोर आले आहे.
मीडिया रिपोर्ट्सनुसार, 'भूल भुलैया २' च्या यशनंतर निर्मात्यांनी या चित्रपटाचा तिसरा भाग बनवण्याचे ठरवले आहे. निर्मात्यांनी हा चित्रपट बिग बजेटमध्ये बनवायचा निर्णय घेतला आहे. त्यामुळे पुन्हा एकदा या चित्रपटाच्या कलाकारांमध्ये बदल करण्यात येणार आहे. त्याचबरोबर या चित्रपटाच्या कथानकातही बदल करणार असल्याचे बोलले जात आहे. 'भूल भुलैया २' हा चित्रपट ९० कोटी रुपयांच्या बजेटमध्ये बनवण्यात आला होता, तर या चित्रपटाने बॉक्स ऑफिसवर १४० कोटींची कमाई केली होती.
रिपोर्ट्सनुसार, निर्माते 'भूल भुलैया ३' साठी दीपिका पदुकोणला कास्ट करण्याचा विचार करत आहेत. दीपिका पदुकोणशी अद्याप कोणतीही चर्चा झाली नसून, निर्मात्यांनीही याबाबत अधिकृत घोषणा केलेली नाही. पण या चित्रपटात दीपिका पदुकोणची एन्ट्री झाली तर, चित्रपटात काही ना काही नवीन ट्वीस्ट प्रेक्षकांना नक्की पाहायला मिळतील. त्याचबरोबर दीपिका पदुकोण आणि कार्तिक आर्यन ही जोडी देखील पहिल्यांदाच रुपेरी पडद्यावर एकत्र दिसेल.
'भूल भुलैया'च्या पहिल्या भागात अक्षय कुमार, साहनी आहुजा, विद्या बालन आणि अमिषा पटेल या कलाकारांनी काम केलं होतं. तर या चित्रपटाच्या दुसऱ्या भागात कार्तिक आर्यन, कियारा अडवाणी आणि तब्बू यांसारखे सुपरस्टार दिसले होते. दोन्ही भागांच्या यशानंतर आता चाहते चित्रपटाच्या तिसऱ्या भागाची आतुरतेने वाट पाहत आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
