महाराष्ट्रात कोरोना रुग्णसंख्येत घट, मुंबईलाही किंचित दिलासा, पण....; आजची आकडेवारी पाहाच

मुंबई : महाराष्ट्रात गेल्या काही दिवसांपासून कोरोनाच्या नव्या रुग्णसंख्येत (corona new patients) मोठी वाढ होत आहे. काल रविवारी राज्यात नव्या रुग्णसंख्येनं चार हजारांचा टप्पा पार केला होता. परंतु, आज सोमवारी कोरोनाच्या रुग्णसंख्येत घट झाल्याने नागरिकांना दिलासा मिळाला असला तरी चिंता कायम आहे. महाराष्ट्रात (Maharashtra corona update) आज २३५४ कोरोनाच्या नव्या रुग्णांचे निदान झाले आहे. त्यामुळे सक्रिय रुग्णांचा एकूण आकडा २४६१३ वर गेला आहे. तर आज दिवसभरात कोरोनाच्या दोन रुग्णांचा मृत्यू (corona deaths) झाला असून कोरोना मृतांची एकूण संख्या 1,47,888.वर पोहोचली आहे.

मिळालेल्या माहितीनुसार, राज्यात दिवसभरात कोरोनाच्या १४८५ रुग्णांना डिस्चार्ज दिला आहे. त्यामुळे आजपर्यंत कोरोनातून बरे झालेल्या रुग्णांची संख्या ७७,६५,६०२ एवढी झाली आहे. त्यामुळे कोरोना रुग्ण बरे होण्याचा दर ९७.८३ टक्क्यांवर पोहोचला आहे. दरम्यान, मुंबईतही आज कोरोनाच्या नव्या रुग्णसंख्येत घट झाली आहे. कालच्या आकडेवारीच्या तुलनेत आजच्या रुग्णसंख्येत घट झाल्याने नागरिकांना दिलासा मिळाला आहे.

परंतु कोरोनाचा धोका अजून टळलेला नाहीय. मुंबईत आज दिवसभरात १३१० नव्या कोरोना रुग्णांची नोंद करण्यात आलीय. तसेच आज कोरोनाचे १११६ रुग्ण बरे होऊन घरी परतले आहेत. त्यामुळे मुंबईतील बरे झालेल्या कोरोना रुग्णांची संख्या १०६२२८० वर गेली आहे. तर कोरोनातून बरे झालेल्या रुग्णांचा दर ९७ टक्क्यांवर पोहोचला आहे. तसेच मुंबईत १४०८९ एवढे सक्रिय रुग्ण आहेत. कोरोना रुग्ण दुपटीचा कालावधी ३७४ दिवसांवर पोहोचला आहे.

Edited By - Naresh Shende