Buldhana Bus Accident: बुलडाण्यात प्रवासी बस पुलावरुन नदीत कोसळली, महिला प्रवाशाचा मृत्यू तर 17 जण जखमी

संजय जाधव, बुलडाणा

Buldhana News: बुलडाण्यामध्ये प्रवासी बसला भीषण अपघात (Buldhana Bus Accident) झाल्याची घटना समोर आली आहे. पैनगंगा नदी पुलावरुन बस खाली कोसळून हा अपघात झाला आहे. ही बस पुण्याला (Pune) निघाली होती. या अपघातामध्ये बसमधील एका महिला प्रवाशाचा मृत्यू झाला आहे तर 17 जण जखमी झाले आहेत. या अपघाताचा तपास बुलडाणा पोलिस (Buldhana Police) करत आहेत.

मिळालेल्या माहितीनुसार, बुलडाण्याच्या शेगाववरुन पुण्याला जाण्यासाठी निघालेल्या प्रवासी बसला मंगळवारी रात्री 11:30 वाजताच्या सुमारास अपघात झाला. स्वरा ट्रॅव्हल्सच्या खासगी लक्झरी बसला हा अपघात झाला आहे. चिखली रोडवरील पेठजवळ ही घटना घडली. पेठ या गावाजवळ असलेल्या पैनगंगा नदीच्या पुलावरून बस खाली कोसळली.

ही लक्झरी बस जवळपास 25 ते 30 फूट खोल कोसळली. अपघातामध्ये बसमधील सर्व प्रवासी जखमी झाले आहेत. जवळपास 25 प्रवासी या बसमधून प्रवास करत होते. या अपघातामध्ये एका महिला प्रवाशाचा मृत्यू झाला आहे. तर 17 जण जखमी झाले आहेत. जखमींमध्ये अनेकांची प्रकृती गंभीर आहे. अपघाताची माहिती मिळताच पेठ येथील गावकऱ्यांनी घटनास्थळी धाव घेत मदतकार्य सुरु केले.

ग्रामस्थांनी बसमध्ये अडकलेल्या सर्व जखमींना बाहेर काढले. जखमी झालेल्या प्रवाशांना तात्काळ चिखली येथील ग्रामीण रुग्णालयात उपचारासाठी दाखल करण्यात आले. यामधील तिघांची प्रकृती गंभीर आहे. हा अपघात नेमका कसा झाला याचे कारण अद्याप समोर आले नाही. दरम्यान, या अपघातानंतर बुलडाणा पोलिसांनी घटनास्थळी धाव घेत तपास सुरु केला आहे.