Beed जिल्ह्यातील निजामकालीन 389 शाळांचे होणार पुनरुज्जीवन; 70 कोटी मंजूर

बीड - बीड जिल्ह्यातील निजामकालीन तब्बल 389 शाळांचे आता पुनरुज्जीवन होणार असून त्यासाठी 70 कोटी रुपये निधी मंजूर करण्यात आला आहे. अशी माहिती सामाजिक न्यायमंत्री धनंजय मुंडे यांनी दिली आहे. याबाबतचा शासन निर्णय नुकताच निर्गमित करण्यात आला आहे. या शाळांचे पुनरुज्जीवन करण्याचे काम लवकरच हाती घेणार असल्याचे धनंजय मुंडे यांनी स्पष्ट केले आहे. ते बीड जिल्हाधिकारी कार्यालयात जिल्हा परिषदेच्या वतीने आयोजित आदर्श शिक्षक पुरस्कार वितरण समारंभात बोलत होते.

हे देखील पहा :

ते म्हणाले, की मराठवाड्यातील निजामकालीन शाळांच्या बांधकामासाठी 200 कोटी रुपये एवढा निधी मंजूर करण्यात आला असून यामध्ये सर्वाधिक निधी हा बीड जिल्ह्यास दिला आहे. मराठवाड्यात सर्वात जास्त निजामकालीन शाळा या बीड जिल्ह्यात आहेत आणि या सर्वच शाळांच्या बांधकामासाठी, मराठवाडा मुक्ती संग्राम दिनाचे औचित्य साधत याची घोषणा केली असल्याचे, धनंजय मुंडे यांनी सांगितलं.

दरम्यान, यावेळी मुख्यमंत्री व उपमुख्यमंत्र्यांचे त्यांनी आभार देखील मानले. दरम्यान मराठवाडा मुक्ती संग्राम दिनाचे औचित्य साधत, बीड जिल्ह्यातील 22 शिक्षकांना आदर्श शिक्षक पुरस्काराने यावेळी गौरविण्यात आले. यावेळी व्यासपीठावर आमदार संदीप क्षिरसागर, आमदार संजय दौंड, जिल्हाधिकारी राधाबिनोद शर्मा, मुख्य कार्यकारी अधिकारी अजित पवार यांच्यासह मान्यवरांची उपस्थिती होती.

Edited By : Krushnarav Sathe