नागपूरमध्ये खळबळ! पोलिसांच्या हातावर तुरी देत न्यायालय परिसरातून आरोपीने ठोकली धूम

नागपूर : नागपूरमध्ये पोलीस प्रशासनात (Nagpur Police) खळबळ उडवणारी घटना घडली आहे. नागपूर जिल्ह्यातील कामठी न्यायालयात पेशीसाठी आणलेला एक सराईत आरोपी पोलिसांच्या हातावर (Accused Absconding) तुरी देऊन फरार झाला आहे. शेख जाफर शेख मुझफर असं आरोपीचं नाव आहे. आरोपी शेख मुझफरने पळ काढल्याचे कळताच पोलिसांनी त्याचा पाठलाग केला होता. परंतु शेखला पकडण्यात पोलिसांना अपयश आलं.

मिळालेल्या माहितीनुसार, नागपूर जिल्ह्यातील कामठी न्यायालयात (kamptee court) पेशीसाठी आणलेला एक सराईत आरोपी पळून गेला आहे. शेख जाफर शेख मुझफर या आरोपीने पोलिसांच्या हातावर तुरी देत धूम ठोकली आहे. कामठी न्यायालयात आज तीन आरोपींची पेशी होती. तिन्ही आरोपींना न्यायालयात हजर करण्यासाठी आणले होते. मात्र, एका आरोपीनं संधी साधत इमारतीच्या मागील झुडपातून पळ काढला. पोलिसांनी त्या आरोपीचा पाठलाग केला पण तो पोलिसांच्या हाती लागला नाही.

Edited By - Naresh Shende