अहमदनगरमध्ये खळबळ! आठ गावठी कट्टे जप्त, पोलिसांनी आरोपींच्या आवळल्या मुसक्या

अहमदनगर : श्रीरामपूर शहरात मोठ्या प्रमाणावर गुन्हेगारी वाढत असल्याचं समोर आलं आहे. श्रीरामपूर शहरातील गुन्हेगारीला (Shrirampur crime) आळा घालण्यासाठी पोलिसांकडून धापेमारी करण्यात आली. यावेळी पोलिसांना येथील एका पेट्रोल पंप परिसरात गावठी कट्टे बनविणाऱ्यांचा अड्डा असल्याची खबर मिळाली होती. त्यानंतर सदर ठिकाणी पोलिसांनी धाड टाकून गावठी कट्टे बनवणाऱ्यांचा अड्डा उद्ध्वस्त केला आहे. पोलिसांनी या धडक कारवाईत तीन आरोपींना अटक (Three culprit arrested) केले असून त्यांच्याकडून आठ गावठी कट्टे जप्त केले आहेत. राहुल सिंग कलानी,आकाश सिंग जुनी व अक्षय सिंग कलानी अशी अटक केलेल्या आरोपींची नावे आहेत.

अहमदनगरचे पोलीस अधिक्षक मनोज पाटील यांनी दिलेल्या माहितीनुसार, अहमदनगर जिल्ह्यातील श्रीरामपूर शहरात एलसीबी पथकाने कारवाई करून एकाचवेळी आठ गावठी कट्टे जप्त केले आहेत. श्रीरामपूर शहरातील एका पेट्रोल पंप परिसरात पोलिसांनी छापेमारी करत गावठी कट्टे बनविणाऱ्यांचा अड्ड्याचा पर्दाफाश केला आहे.

या प्रकरणी तीन आरोपींना पोलिसांनी अटक केली असून पुढील तपास सुरु आहे. या गुन्ह्यात इतर काही व्यक्तींचा सहभाग आहे का, याचाही पोलिसांकडून शोध सुरु आहे. जेरबंद केलेल्या आरोपींचा मध्ये प्रदेश येथे कनेक्शन आहे का ? याचाही छडा पोलीस लावत असून तपासाची सूत्र वेगानं फिरवली असल्याचं समजते.

Edited By - Naresh Shende