Ahmednagar News: अपघाताचा बनाव करत ३० लाखाच्या लसूणची परस्पर विक्री; चालकासह तिघे पोलिसांच्या ताब्यात

सुशील थोरात

अहमदनगर : खरेदी केलेला ३० लाखांचा लसूण ट्रक चालकाने परस्पर विकून टाकला. यानंतर चालकाने ट्रकचा अपघात (Accident) झाल्याचा बनाव केला होता. हा प्रकार समोर आल्यानंतर (Ahmednagar) स्थानिक गुन्हे शाखेच्या पोलिसांनी आरोपींना बेड्या ठोकल्या आहेत. (Maharashtra News)

गुजरात येथील एस एस ट्रेडिंग कंपनीने गुजरात येथीलच सिद्दीकी ब्रदर्स यांच्याकडून २२ हजार १६० किलो वजनाचा तब्बल ३० लाख रुपयांचा लसूण (Garlic) खरेदी केला होता. दरम्यान खरेदी केलेला लसूण मध्यप्रदेश येथून बैंगलोर येथे मोदी रोडलाईन्स ट्रान्सपोर्ट यांच्या माध्यमातून पाठविण्यात आला होता. मात्र ट्रान्सपोर्टवाल्याने ट्रकमधून पाठविलेला लसणाचा ट्रकचा अहमदनगर जिल्ह्यातील साकत शिवारात अपघात झाल्याचा बनाव चालकाने करत सर्व लसूण एका मध्यस्थीमार्फत परस्पर विक्री केली होती. दरम्यान या संदर्भात तालुका पोलीस ठाण्यात गुन्हा दाखल करण्यात आला होता.

तीनजण पोलिसांच्या ताब्यात 
घडलेला प्रकार आणि त्याची रक्कम मोठी असल्याने याचा तपास स्थानिक गुन्हे शाखेकडे देण्यात आला होता. त्यानुसार स्थानिक गुन्हे शाखेचे पोलीस निरीक्षक दिनेश आहेर यांनी चक्रे फिरवत आरोपीना बेड्या ठोकल्या आहेत. स्थानिक गुन्हे शाखेच्या पोलिसांनी सवरलाल अंबालाल जाट आणि रविकांत काळुराम सेन व रामदास तुकाराम बोलकर या तिघांना अटक केली आहे.