Maharashtra Politics: 50 खोके एकदम ओक्के झालं का? नागार्लंडच्या मुद्द्यावरुन गुलाबराव पाटलांनी छेडले; अजित पवार संतापले

Maharashtra Assembly Budget Session: नागार्लंडमध्ये राष्ट्रवादी कॉंग्रेसने भाजपसोबत जाण्याचा निर्णय घेतल्यानंतर राज्याचे राजकारण चांगलेच तापले आहे. नागार्लंडमध्ये सत्ता स्थापन झाल्यानंतरही राष्ट्रवादीने पाठींबा दिल्याने आश्चर्य व्यक्त केले जात आहे. तर दुसरीकडे याच मुद्द्यावरुन सत्ताधारी महाविकास आघाडीला कोंडीत पकडण्याचा प्रयत्न करत आहेत.

यावरून सत्ताधाऱ्यांनी महाविकास आघाडीला लक्ष्य केलेलं असतानाच अर्थसंकल्पीय अधिवेशनात या मुद्द्यावरून खडाजंगी झाल्याचं पाहायला मिळाले. कॅबिनेट मंत्री गुलाबराव पाटील यांनी हा मुद्दा उपस्थित करताच अजित पवार(Ajit Pawar) चांगलेच संतापले. त्यांनी भर सभागृहात गुलाबराव पाटील यांना खडेबोल सुणावले.

नागार्लंडच्या मुद्दयावर बोलताना गुलाबराव पाटील यांनी महाविकास आघाडीवर टीका केली. "नागालँडमध्ये राष्ट्रवादीकडून भाजपाच्या फक्त मुख्यमंत्र्याला पाठिंबा दिला आहे. म्हणजे बदलाचे वारे नेमके कसे वाहायला लागले आहेत? नागालँडमध्येही ५० खोके, बिलकुल ओके असं काही झालंय का? एकीकडे इथे जातीयवादी सरकार म्हणून आरोप करायचे आणि दुसरीकडे मांडीला मांडी लावून बसायचं असं चित्र निर्माण झालंय. ५० खोके आणि बिलकुल ओके, नागालँड ओके असं झालंय का?” असा खोचक सवाल गुलाबराव पाटील यांनी उपस्थित केला.

यावर बोलताना अजित पवार यांनी "प्रत्येक गोष्टीत राजकारण आणायला हवं असं नाहीये. राज्य सरकार, केंद्र सरकार, सगळ्या संस्था त्यांच्या ताब्यात आहेत. चौकशी करा ना. ही कुठली पद्धत काढली? तुमच्या हातात आहे ना? मग करा ना चौकशी. कारण नसताना कुणावरही कसलेही आरोप का करताय?” असा संतप्त सवाल उपस्थित केला.

तसेच याबद्दल पुढे बोलताना "नागालँडमधली परिस्थिती वेगळी आहे. तिथे सर्व पक्ष एकत्र मिळून सरकार स्थापन करतात अशी परंपरा आहे. भारतातला तो भाग भारतातच राहण्यासाठी भारतीय म्हणून निर्णय घेतला आहे. त्याची चर्चा इथे करून गैरसमज पसरवण्याचं काहीच कारण नाही”, असेही अजित पवार यावेळी म्हणाले. (Maharashtra Politics)