Leopard Attack: कुटुंबावर तुटून पडलेल्या बिबट्याशी लढली, झुंजली; पत्नीनं पती अन् मुलाचा वाचवला जीव

अंबरनाथ : अंबरनाथ तालुक्यातील मलंगगड परिसरात बिबट्याने मध्यरात्री एका कुटुंबावर हल्ला चढवला. यावेळी धाडसी पत्नीने बिबट्याचा (Leopard) प्रतिकार करत पती आणि मुलीचे प्राण वाचवले. (Latest Marathi News)

मलंगगड परिसरातील (Amabarnath) जकात नाका भागात पप्प्या बाळ्या पवार हे पत्नी सखू आणि लहान मुलीसह वास्तव्याला आहेत. शुक्रवारी पहाटे हे कुटुंब त्यांच्या झोपडीत झोपलेलं असताना अचानक एक बिबट्या त्यांच्या झोपडीत शिरला आणि पप्या पवार यांच्यावर हल्ला चढवला. या गोंधळाने जागी झालेल्या सखुबाईने त्वरित मुलीला बाजूला घेत हातात काठी घेऊन बिबट्याचा हिंमतीने प्रतिकार केला आणि बिबट्याला पळवून लावले.

पती जखमी, मुलगीही सुरक्षित

या दरम्यान बिबट्याशी झालेल्या झटापटीत तिचा पती पप्या हा जखमी झाला. यानंतर त्याला तातडीने उल्हासनगरच्या शासकीय मध्यवर्ती रुग्णालयात उपचारांसाठी दाखल करण्यात आले. त्याच्या चेहऱ्याला बिबट्याच्या हल्ल्यात जखमा झाल्या असून त्याच्यावर सध्या मध्यवर्ती रुग्णालयात उपचार सुरू आहेत. मात्र यानंतर अतिशय हिमतीने आपल्या कुटुंबाचं बिबट्यापासून रक्षण करणाऱ्या धाडसी सखुबाईचं कौतुक होत आहे.