कळव्यातील मुस्लीम बांधवांच्या निर्णयाचे कौतुक; स्वतः उतरवले मशिदीवरील भोंगे

कळवा: जातीय सलोखा टिकवण्यासाठी आणि कुठली सामाजिक तेढ निर्माण होऊ नये यासाठी कळव्यामधील महात्मा फुले नगर येथील मुस्लिम बांधवांनी पुढाकार घेत आपल्या मशिदीवरील भोंगे उतरवले आहेत. कळवा पोलीस ठाण्याचे वरिष्ठ पोलीस निरीक्षक मनोहर आव्हाड यांच्या उपस्थितीत मुस्लिम बांधवांनी हे भोंगे उतरवले आहेत. सर्वोच्च न्यायालयाचे आदेशाचे पालन करून कळवा पोलीस ठाण्याचे वरिष्ठ पोलीस निरीक्षक मनोहर आव्हाड यांनी मौलानांची बैठक घेतली. त्यावेळी कळव्यातील महत्मा फुले नगर येथील मशिदीचे ट्रस्टी पोलीस ठाण्यात आले आणि आपण सर्वोच्च न्यायालयाच्या आदेशाचे पालन करत असल्याचे त्यांनी सांगितले.

११ वाजता भोंगे स्वतःहून उतरवणार असल्याची माहिती पोलिसांना दिली. त्यानंतर आज वरिष्ठ पोलीस निरीक्षक मनोहर आव्हाड यांच्या उपस्थितीत मलंग गोकाक, फैयाज गोकाक, कदर बिजपुरे, इब्राहीम शेख यांनी स्वतः मशिदीवरील तीन भोंगे उतरवले. या मुस्लीम बांधवांनी घालून दिलेल्या आदर्शाचे पोलिसांनी कौतुक केले आहे. आणि त्यासाठी वरिष्ठ पोलीस निरीक्षक मनोहर आव्हाड यांनी त्यांचे पुष्पगुच्छ देऊन सत्कार करत अभिनंदन केले आहे. असाच आदर्श स्वतःहून सर्वांनी घ्यावा असे आवाहन यावेळी कळव्याचे वरिष्ठ पोलीस निरीक्षक मनोहर आव्हाड यांनी केले आहे. ही मशीद बांधून २४ वर्ष पूर्ण झाली आहेत. या आधी ही मशीद हरदास नगर येथे होती.

पुनर्वसन दरम्यान आपले पूर्वज मुरादभाई सोलापूर यांच्या नेतृत्वाझाली ही मशीद या ठिकाणी बांधण्यात आली असल्याचे फैयाज गोकाक यांनी सांगितले. जातीय सलोखा टिकवण्यासाठी मुस्लिम बांधवांकडून घेतला गेलेल्या या निर्णयाचा सर्वच कळवा वासियांकडून कौतुक केल जात आहे.

Edited By: Pravin Dhamale