Ashadhi Wari 2022 : वारकरी वेषातील सातारा पोलिसांची वारीत दमदार कामगिरी

सातारा : संत ज्ञानेश्वर माऊलींच्या पालखीचे (sant dnyaneshwar maharaj palkhi sohala) फलटण (phaltan) नगरीत मोठ्या उत्साहात स्वागत झाले. माऊलींचा मुक्काम फलटण शहरातील विमानतळ मैदानावर असताना सातारा स्थानिक गुन्हे शाखेच्या वतीने वारकऱ्यांच्या वेषात फिरणाऱ्या तसेच संशयित रित्या फिरणाऱ्या चोरट्यांना लक्ष करून कारवाई करण्याचे काम केले. विशेष म्हणजे सातारा स्थानिक गुन्हे शाखेचे (lcb) सर्व कर्मचारी हे या ठिकाणी वारकरी वेशातच पाहायला मिळाले. वारकरी वेषात पोलिसांनी लोणंद पासून फलटणपर्यंत 44 चोरटे पकडले. यामध्ये नऊ महिलांचा समावेश आहे. (ashadhi wari 2022 marathi news)

संतश्रेष्ठ श्री ज्ञानेश्वर महाराज पालखी सोहळ्याचा मुक्काम यंदा सातारा जिल्ह्यात सहा दिवस आहे. आज सकाळच्या सुमारस पालखी साेहळा फलटणहून बरड येथे मार्गस्थ झाला. या मुक्काच्या कालावधीत वारकऱ्यांना आरोग्य सुविधा मिळाव्यात यासाठी जिल्हा आराेग्य विभागातर्फे विविध पथके तैनात करण्यात आली आहे. या पथकांच्या माध्यमातून वारकऱ्यांची आरोग्य तपासणी करुन त्यांना जाग्यावरच औषधोपचार केले जात आहेत.

संतश्रेष्ठ ज्ञानेश्वर महाराज पालखी सोहळ्यात वारक-यांचे माैल्यवान साहित्य चाेरीस जाऊ नये, विविध ठिकाणी हाेणा-या छाेट्या आणि माेठ्या चाे-या राेखण्यासाठी सातारा पाेलीस दलाने विशेष खबरदारी घेतली आहे.

सातारा स्थानिक गुन्हे शाखेचे पाेलीस वारकऱ्यांच्या वेषात पालखी साेहळ्यात फिरत आहेत. संबंधित पाेलीस संशयित रित्या फिरणाऱ्यांवर लक्ष ठेवतात. त्यानंतर पाेलीस संबंधिताची चाैकशी करुन त्याच्याकडील असलेले साहित्याबाबत विचारण करताना त्यांना काही शंका आल्यास त्यास पाेलीसी खाक्या दाखविला जाताे. त्यातून 44 चाेरटे पाेलीसांनी जेरबंद केले.

वाहतुकीत बादल

नातेपुतेकडून फलटण तसेच फलटण ते नातेपुते दिशेने होणारी सर्व वाहतुक बंद आहे. फलटण ते लोणंद, फलटण ते दहिवडी , फलटण ते सातारा वाहतुक चालू आहे असे सातारा पाेलीस दलाने कळविले आहे.

Edited By : Siddharth Latkar