सुप्रियाताईंना २ मुख्यमंत्र्यांची सवय, रिमोट काढून घेतल्याने नाराजी; मुख्यमंत्र्यांचे पवार कुटुंबीयांवर टीकास्त्र

औरंगाबाद: मुख्यमंत्री एकनाथ शिंदे आज औरंगाबाद दौऱ्यावर आहेत. यावेळी कॅबिनेट मंत्री संदीपान भुमरे यांनी पैठणमध्ये मुख्यमंत्र्याची जाहीर सभा आयोजित केली होती. या सभेत बोलताना मुख्यमंत्र्यांनी उद्धव ठाकरेंसह पवार कुटुंबीयांवर टीका केली आहे.

सभेत बोलताना शिंदे म्हणाले, 'आपण एकदा दिलेला शब्द बदलत नाही. याबाबतीत मी स्वत:चं देखील ऐकत नाही. बाळासाहेबांची खरी शिवसेना कोणती? याचे उत्तर आजच्या गर्दीने दिले आहे. जबरदस्तीने पैसे देऊन जमा झालेली ही गर्दी नाही, प्रेमाने आलेली गर्दी आहे.

संदिपान भुमरे यांच्यावरती प्रेम करणाऱ्याची ही गर्दी आहे. मी पुन्हा एकदा सांगतो की ही सच्चा शिवसैनिकांची गर्दी आहे. बाळासाहेबांच्या विचाराला पसंती देणाऱ्यांची गर्दी असल्याचं म्हणत त्यांनी आपली शिवसेना हीच खरी शिवसेना असल्याचा पुनरुच्चार केला.

पाहा व्हिडीओ -

तर यावेळी त्यांनी सुप्रिया सुळे यांनी केलेल्या टीकेला प्रत्युत्तर दिलं, मुख्यमंत्री म्हणाले, ' ताई म्हणातात, अजित दादा सकाळी ६ ला उठून काम करायचे. आधी दादा टीका करायचे आता ताई पण सुरु झाल्या आहेत. टीका करणं विरोधकांचे काम आहे. टीका करणं हा त्यांचा धंदा आहे.

अजित पवार ६ ला उठून काम करतात तर हा एकनाथ शिंदे सकाळी ६ पर्यंत करतो आणि ते मी सदैव करत राहणार. शिवाय ताईं २ मुख्यमंत्री हव्या आहेत म्हणाल्या, त्यांना पुर्वीची सवय आहे. त्यावेळी दोन मुख्यमंत्री होते. त्यांचा रिमोट कंट्रोल काढून घेतला आहे. त्यामुळे त्या नाराज असल्याचा टोला त्यांनी सुळेंना लगावला.