Beed News: कोरोनात ज्या लसीसाठी वशिला लावला, जादा पैसे मोजले; तेच इंजेक्शन एक्सपायर

बीड : कोरोनाची दुसरी लाट संकंटाची होती. प्रत्‍येकाला जीव वाचवायचा प्रयत्‍न सुरू होता. यात कोरोनाची (Corona) लागण झाल्‍यानंतर ऑक्‍सीजनची कमतरता भासत होती. याच दरम्‍यान प्रभावी मानले जात असलेले रेमडीसिवरची (Remdesivir) लस मिळणे कठीण होते. यामुळे वशिला लावत ब्‍लॅकमध्‍ये ही लस खरेदी करत होते. परंतु, आता हीच लस एक्सपायर झाले आहे. (Letest Marathi News)

कोरोनाच्या दुसऱ्या लाटेत रेमडिसिवर इंजेक्शन प्रभावी असल्याचा दावा केला जात होता. यामुळे या दरम्यान तुटवडा जाणवल्याने रेमडिसिविर इंजेक्शनसाठी अनेकांनी वशिले लावले. काही लोकांनी अधिकाऱ्यांच्या घरासमोर रात्र जागवली होती. मात्र आता कोरोनाची रुग्णसंख्या कमी झाल्याने या इंजेक्शनची मागणीही घटली. आता ही लस पडून आहे.

साडेपाच हजार इंजेक्‍शन नष्‍ट करणार

राज्य शासनाने बीड (Beed) जिल्हा रुग्णालयाला दिलेले ५ हजार ५७० रेमडिसीवर इंजेक्शन एक्सपायर झाले आहेत. मागणी नसल्‍याने शासनाने पुरविलेले बीड जिल्हा रुग्णालयातील तब्बल ५ हजार ५७० इंजेक्शन एक्सपायर झाले आहेत. तर जे इंजेक्शन एक्सपायर झाले आहेत, ते नष्ट करण्याची कारवाई पुढील आठवडाभरात होणार असल्याचे सांगण्यात आले आहे. दरम्यान यामुळं शासनाचे काहीसे नुकसान देखील होणार आहे.