आघाडी सरकार कोसळले अन्‌ एसटी कर्मचाऱ्यांनी फोडले फटाके

बीड : तीन पक्षाने एकत्र येऊन स्थापन केलेले महाविकास आघाडी सरकार अखेर कोसळले आहे. मुख्यमंत्री उद्धव ठाकरे यांनी स्वतःहून राजीनामा दिला असून हे सरकार कोसळल्याने बीडमध्ये एसटी कर्मचाऱ्यांमध्ये आनंद उत्सव पाहायला मिळाला. बीडच्या (Beed) माजलगावमध्ये एसटी कर्मचाऱ्यांनी (St Employee) फटाके फोडत पेढे वाटून आनंदोत्सव साजरा केला. (beed news maharashtra government collapsed and the ST workers exploded firecrackers)

राज्‍यातील आघाडी सरकार (Mahavikas Aaghadi) कोसळल्‍याबाबत एसटी कर्मचारी म्हणाले, की आज खऱ्या अर्थाने एसटी कामगारांचा विजय झाला असे म्हणावे लागेल. आमचे 5 महिने आंदोलन झाले; मात्र याची दखल सरकारने घेतली नाही. उलट आमचे म्हणणे मांडणाऱ्या ॲड. गुणरत्न सदावर्ते यांच्यावर कारवाई केली. त्यानंतर ते देखील म्हणाले की हे सरकार टिकणार नाही. त्यांनी केलेले भाकीत शेवटी सत्य झाले. त्यामुळे आज आम्ही फटाके वाजवून व पेढे वाटून आनंद साजरा केला असून आता या सरकारने तरी आम्हाला न्याय द्यावा. अशी अपेक्षा कर्मचाऱ्याने व्यक्त केलीय.