Breaking Beed : करुणा मुंडेंच्या गाडीत आढळली पिस्तूल! पोलिसांनी घेतले ताब्यात

बीड : गेल्या दोन दिवसापूर्वी करूणा मुंडे (Karuna Munde) यांनी धनंजय मुंडे यांच्यासंदर्भात अनेक गोष्टींचा पुराव्यानिशी खुलासा करणार असल्याचे फेसबुक लाइव्द्वारे जाहीर केले होते. तसेच या सर्व बाबी आपण परळीत (Parali) येऊन पत्रकार परिषदेच्या माध्यमातून मांडणार असल्याचे सांगितले होते. आपल्याला जिवंत जाळण्याच्या आणि जीवे मारण्याच्या धमक्या येत असल्या तरीही, पत्रकार परिषद घेणारच अशी ठाम भूमिका त्यांनी घेतली होती. त्यामुळे बीडसह (Beed) संपूर्ण राज्यात एकच खळबळ उडाली होती.

हे देखील पहा -

करुणा मुंडे या दुपारी परळीत दाखल झाल्या व त्यानंतर त्यांनी प्रभू वैद्यनाथाचे दर्शन घेण्याचा प्रयत्न केला. मात्र, त्यांना काही महिलांकडून धक्काबुक्की झाल्याने गोंधळ उडाला होता. त्यामुळे खबरदारीचा उपाय म्हणून करुणा मुंडे यांना परळीच्या शहर पाण्यात बसवलं होतं. मात्र पोलीस ठाण्याबाहेर महिलांसह धनंजय मुंडे यांच्या कट्टर समर्थकांनी प्रचंड गर्दी करत, करुणा मुंडेंविरोधात जोरदार घोषणाबाजी करायला सुरुवात केली. आमच्या साहेबाला बदनाम करायला परळीत आलाय का ? असा सवाल करत धनंजय मुंडे समर्थक महिलांनी त्यांना अडवण्याचा प्रयत्न केला व घेराव घातला. यावेळी करुणा मुंडेंवर गुन्हा दाखल करावा अशी मागणी केली. त्यामुळे करुणा मुंडे ज्या गाडीने आल्या होत्या, त्या इनोव्हा क्र.एम. एच.04, एच.एन. 3902 या गाडीची पोलिसांनी तपासणी केली.

यावेळी गाडीच्या मागच्या डिक्कीत एक पिस्टल सापडल्याने मोठी खळबळ उडाली आहे. दरम्यान सापडलेले पिस्तूल पोलिसांनी जप्त केले असून त्याचा परवाना आहे की नाही ? तसेच करुणा शर्मा या पिस्तूल घेऊन परळीत का आल्या ? त्यांचा काही घातपात करण्याचा उद्देश तर नव्हता ना ? याचाही तपास परळी पोलिस करत आहेत. दरम्यान, करुणा मुंडे या परळीत दाखल झाल्यानंतर आणि त्यांच्या गाडीत पिस्तूल आढळल्यानंतर परळीत प्रचंड तणावाचे वातावरण निर्माण झाले आहे.

Edited By : Krushnarav Sathe