आमदारांच्या केसालाही धक्का लावला तर..; नारायण राणेंचा शरद पवारांना इशारा

मुंबई : राष्ट्रवादी कॉंग्रेसचे अध्यक्ष शरद पवार (Sharad Pawar) यांनी माध्यमांशी संवाद साधून बंडखोर आमदारांना इशारा दिला होता. बंडखोर आमदारांना परिणाम भोगावे लागतील, असा इशारा पवारांनी दिला होता. त्यानंतर आता भाजप नेते आणि केंद्रीय मंत्री नारायण राणे (Narayan Rane) यांनी ट्विटरवरुन शरद पवार यांच्यावर निशाणा साधला आहे. आमदारांच्या केसालाही धक्का लावल्यास घर गाठणे कठिण होईल, असा इशारा राणे यांनी दिला आहे. (Political Crisis in Maharashtra)

नारायण राणे यांनी ट्विटरवर पवार यांच्यावर टीका करताना म्हटलं, माननीय शरद पवार साहेब या सर्वांना धमक्या देत आहेत,'सभागृहात येऊन दाखवा',ते येणारच आहेत. ते येणार आणि त्यांच्या मनाप्रमाणे मतदान करणार. त्यांच्या केसालाही धक्का लावल्यास घर गाठणे कठिण होईल. आघाडी सरकार हे सोयीसाठी व स्वार्थासाठी तयार झालेले सरकार आहे. त्यामुळे कामाच्या व कार्याच्या बढाया मारू नयेत. (Narayan Rane Latest Marathi News)

काही जणांनी अनेक वेळा बंडखोरी केली. त्या बंडखोरीचा इतिहास उभ्या महाराष्ट्राला माहीत आहे.नको त्या क्षणी नको त्या वयात मान्यवरांना धमक्या देणे शोभत नाही. तसंच राणे यांनी शिवसेना खासदार संजय राऊत यांच्यावरही टीकास्त्र सोडले आहे. संजय राऊत तुमचे (शिवसेना)किती आमदार राहिलेत? मतदानाची अपेक्षा करू नका, पराभवाची करा, असा घणाघात राणे यांनी शिवसेनेवर केला आहे.

Edited By - Naresh Shende