संजय राठोड
यवतमाळ: यवतमाळ (Yavatmal) मधील आर्णी येथील व्यावसायिकासह त्यांच्या पुत्राला सोशल मीडियाद्वारे खंडणी मागून खुनाची धमकी देण्यात आल्या प्रकरणी गुन्हा नोंद करण्यात आला होता. त्या मुलाला बाहेरगावी शिक्षण घेण्यासाठी जायचे असल्याने खंडणी आणि धमकीचा बनाव सोशल मीडियाद्वारे (Social Media) रचला असल्याचे समोर आले आहे. यवतमाळ येथील सायबर सेलने केलेल्या तपासात व्यावसायिक पुत्राचाच धमकीमध्ये हात असल्याचे निष्पन्न झाले आहे.
मिळालेल्या माहितीनुसार, २९ फेब्रुवारी २०२२ रोजी रात्री नऊ वाजता व्यावसायिक हे जेवणानंतर लहान मुलासोबत घराबाहेर शतपावली करीत होते. यावेळी एक दुचाकीस्वार चालत्या वाहनावरून थुंकला. सदर थुंकी व्यावसायिकाच्या अंगावर उडाली. त्यामुळे हटकले असता दुचाकीस्वार पळून गेला. त्यानंतर ३ मे रोजी व्यावसायिक दुपारी घरी असताना त्यांना बहिणीने विनय टाके नामक व्यक्तीने तुझ्या श्रद्धाजंलीची पोस्ट फेसबुकवर टाकली असल्याचे सांगितले. त्यावर व्यावसायिकाने कुणी थट्टा करीत असेल, असे म्हणून दुर्लक्ष केले. मात्र ४ मे रोजी त्यांना सोशल मीडियावर मेसेज आला.
मुलाने परिधान केलेल्या कपड्यांचा उल्लेख करून तो क्लासमधून घरी निघाला असल्याचे सांगत १० मेपर्यंत मुलाचा गेम करण्याची धमकी दिली. तसेच ५ मे रोजी पुन्हा सोशल मीडियावर मेसेज करून कपड्यावर थुंकलो होतो, याची आठवण करून दिली. तू शिव्या दिल्याने त्याचा बदला मर्डर करून घेतो, असे म्हणून वारंवार जिवे मारण्याच्या धमक्या दिल्या. ६ मे रोजी अकाउंट बंद झाल्याने अन्य सोशल मीडियावरून मुलास जिवे मारण्याचे व खंडणीचे मेसेज सुरू झाले. त्यामुळे दहशतीचे वातावरण पसरले.
आर्णी पोलिसांनी (Police) घटनेचे गांभीर्य ओळखून गुन्हा दाखल केला. सदर प्रकरण तांत्रिक बाबीशी संबंधित असल्याने पोलीस अधीक्षकांनी आर्णी पोलिसांसह यवतमाळ सायबर सेलला गुन्हा उघडकीस आणण्याचे आदेश दिले. सायबर सेल पथकाने गुन्ह्यातील संपूर्ण तांत्रिक बाबीचे संकलन करून गुन्हा उघडकीस आणला. या गुन्ह्यामध्ये व्यावसायिकाच्या मुलाने स्वत: वेगवेगळ्या नावाने विविध सोशल मीडियावर फेक अकाउंट तयार करून गुन्हा केल्याचे समोर आले.
ही कारवाई पोलीस(Police) अधीक्षक डॉ. दिलीप पाटील-भुजबळ, अपर पोलीस अधीक्षक डॉ. खंडेराव धरणे यांच्या मार्गदर्शनात एसडीपीओ आदित्य मिरखेलकर यांच्या नेतृत्वात आर्णी ठाणेदार पितांबर जाधव, सहायक पोलिस निरीक्षक अमोल पुरी, पीएसआय किशोर खंदार, गजानन डोंगरे, विशाल भगत, कविश पाळेकर, पंकज गिरी, अजय निंबोळकर, सतिष सोनोने, रोशनी जोगळेकर, प्रवीण कुथे यांनी केली.
Read the latest Marathi news and watch Live Streaming on Saam TV. Breaking news from Maharashtra, India, Pune, Mumbai, Politics, Entertainment, Sports, Lifestyle, Jobs, and Education at Saam TV. Get Live Marathi news on Mobile. Download the Saam Tv Marathi news Channel app for Android and IOS.
साम आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, ट्विटर, इन्स्टाग्राम, शेअर चॅट आणि टेलिग्रामवर आम्हाला फॉलो करा. तसेच, साम टीव्हीच्या यूट्यूब चॅनेलला आजच सबस्क्राइब करा.