Nashik Bus Fire : नाशिकमध्ये बर्निंग बसचा थरार; प्रवासी खाली उतरताच एसटी जळून खाक

नाशिक : नाशिकमध्ये एसटी महामंडळाची धावती बस रस्त्यात पेटल्याची घटना समोर आली आहे. मुंबई-आग्रा महामार्गावर चांदवडच्या राहुड घाटात ही घटना घडली. सुदैवानी या घटनेत कोणतीही जीवितहानी अथवा कुणीही जखमी झालेलं नाही.

मिळालेल्या माहितीनुसार, शहादा - नाशिक बसला ही आग लागली आहे. बस शहादाहून निघाल्यानंतर राहुड घाटात असताना अचानक धूर निघू लागला. काही वेळातच धूराचं रुपांतर आगीत झालं आणि संपूर्ण बसने काही क्षणात पेट घेतला. (Maharashtra News)

मुंबई -आग्रा महामार्गावर दुपारी 12 वाजेच्या दरम्यान शहादा येथून नाशिककडे जाणाऱ्या बसला चांदवड तालुक्यातील राहुड घाटात इंजिनमध्ये बिघाड झाल्याने आग लागली. या आगीने बघता बघता रौद्र रूप धारण केलं. यावेळी बस चालकाने सतर्कता दाखवत बस महामार्गाच्या कडेला उभी केली. बसमधील 35 प्रवाशांना सुखरूप बाहेर काढले.

घटनेची माहिती मिळतात अग्निशमन दलाला पाचारण करण्यात आलं. सोमा टोल कंपनीचे कर्मचारी देखील घटनास्थळी दाखल झाले. काही क्षणातचं आगीवर नियंत्रण मिळवण्यात यश आलं.मात्र काही वेळ या मार्गावरील वाहतुकीचा वेग मंदावला होता.