वसई दरड दुर्घटनेत दोघांचा मृत्यू ; मुख्यमंत्र्यांकडून मृतांच्या नातेवाईकांना आर्थिक मदतीचे निर्देश

सुशांत सावंत

वसई : वसई राजवलीच्या वाघरळपाडा या परिसरात दरड कोसळली. वसई पूर्वेच्या वाघरळपाडा येथील एका चाळीतील घरावर दरड कोसळली होती. या दुर्घटनेत सहा जण अडकले होते. वसई विरार अग्निशमन दलाने बचाव कार्य करत ४ जणांना सुखरूप बाहेर बाहेर काढले. मात्र, या दुर्घटनेत दोन जणांचा दुर्दैवी मृत्यू झाला. त्यानंतर दरड कोसळण्याने ढिगाऱ्याखाली अडकून मृत्युमुखी पडलेल्यांच्या नातेवाईकांना तातडीने आर्थिक मदत करण्याबाबचे निर्देश मुख्यमंत्री एकनाथ शिंदे (Eknath Shinde) यांनी पालघर जिल्हाधिकारी आणि वसई-विरार महानगरपालिकेला दिले आहेत. ( Eknath Shinde News In Marathi )

वसई (Vasai) पूर्वेच्या वाघरळपाडा येथील एका चाळीतील घरावर सकाळी दरड कोसळली. यात दुर्घटनेत सहा जण ढिगार्‍याखाली अडकले होते. त्यातील ढिगार्‍यातून चार जणांना सुखरूप बाहेर काढण्यात आले आहे.तर या दुर्घटनेत अमित सिंह (४५) व त्यांची मुलगी रोशनी सिंग (१६) यांचा मृत्यू झाला आहे. या दुर्घटनेतील मृत अमित सिंह यांचा मृतदेह सकाळी साडे दहा वाजता बाहेर काढण्यात आला. तर त्यांच्या मुलीचा मृतदेह एक वाजता काढण्यात आला. त्यानंतर पालघर जिल्हाधिकारी डॉ. माणिक गुरसाल यांच्या आदेशानंतर बचाव कार्य थांबविण्यात आलं.

दरम्यान, वसईच्या राजवली वाघरळपाडा या परिसरात मुसळधार पावसामुळे दरड कोसळण्याने ढिगाऱ्याखाली अडकून मृत्युमुखी पडलेल्यांच्या नातेवाईकांना तातडीने आर्थिक मदत करण्याबाबत मुख्यमंत्री एकनाथ शिंदे यांनी पालघर जिल्हाधिकारी आणि वसई विरार महानगरपालिकेला निर्देश दिले आहेत. या दुर्घटनेतील मृतांच्या नातेवाईकांना प्रत्येकी ४ लाख रुपये जिल्हाधिकाऱ्यांकडील नैसर्गिक आपत्तीविषयक निधीतून आणि प्रत्येकी २ लाख रुपये महानगरपालिकेकडील निधीतून अशी ६ लाख मदत करण्यात येणार आहे. याशिवाय जखमींना प्रत्येकी ५० हजार रुपये उपचारासाठी देण्याचे निर्देशही मुख्यमंत्र्यांनी दिले आहेत.