नशेच्या गोळ्या व औषधांची चोरटी विक्री; मुद्देमालासह दोघे ताब्यात

धुळे : शहरात मानवी मेंदूवर परिणाम करणारे नशेचे औषध व गोळ्या विक्री करणाऱ्या दोघांच्या (Dhule LCB) स्थानिक गुन्हे अन्वेषण विभागाच्या पथकाने मुसक्या आवळल्या आहेत. (Dhule Crime News)

मानवी मेंदूवर विपरीत परिणाम करणारे गुंगीचे औषध व गोळ्यांची चोरटी विक्री सुरू असल्याची माहिती स्थानिक गुन्हे अन्वेषण विभागाच्या वरिष्ठ अधिकाऱ्यांना मिळाली होती. या माहितीच्या आधारे अधिकाऱ्यांनी पथक तैनात केले असता, धुळे (Dhule) शहरातील शिवाजी हायस्कूल परिसरामध्ये दोन इसम दुचाकीवर आपल्या सोबत बॉक्स व गोणी घेऊन संशयितरित्या फिरत असल्याचे आढळून आले. पोलिसांनी तात्काळ या दोघांना थांबवून त्यांच्याकडे असलेल्या बॉक्स व गोणीमध्ये असलेल्या सामानाची तपासणी केली असता, त्यामध्ये कोरेक्स या औषधाच्या बाटल्या व मानवी मेंदूवर परिणाम करणाऱ्या नशेच्या गोळ्या आढळून आल्या आहेत.

94 हजाराची औषधी

या संदर्भात दोघांनाही पोलिसांनी ताब्यात घेत त्यांच्याकडे असलेला सर्व मुद्देमाल ताब्यात घेतला आहे. यामध्ये जवळपास 94 हजाराहून अधिकची किंमत या नशेच्या गोळ्या व औषधांची मानली जात आहे. या दोघांविरोधामध्ये धुळे शहर पोलीस ठाण्यामध्ये गुन्हा दाखल करण्यात आला आहे.