>> भूषण अहिरे
धुळे : प्रशासनाचा भोंगळ कारभार चिमुकल्याच्या जीवावर बेतला आहे. विजेच्या खांबामध्ये करंट उतरल्यामुळे जवळच खेळत असलेल्या आठ वर्षीय चिमुकल्याचा शॉक लागून दुर्दैवी मृत्यू झाला आहे.धुळे शहरातील वडजाई रोड गफुनगर परिसरात ही दुर्दैवी घटना घडली आहे.
गफुनगर परिसरात या चिमुकल्यासह इतर मुलं देखील खेळत होती. खेळता खेळता चिमुकल्याने विजेच्या खांबाला हात लावला असता त्याला विजेचा जबरदस्त धक्का बसला आणि यात त्याचा मृत्यू झाला आहे. हा सगळा प्रकार सीसीटीव्ही कॅमेरात कैद झाला आहे.
हृदय पिळवटून टाकणाऱ्या या धक्कादायक घटनेमुळे परिसरात एकच खळबळ उडाली आहे. वीज वितरण विभागाच्या गलथान कारभारामुळेच या बालकाचा मृत्यू झाला असल्याचा आरोप लावत स्थानिकांनी व नातेवाईकांनी संबंधित वीज वितरण अधिकाऱ्यावर 302 चा गुन्हा दाखल करण्याची मागणी केली. तसेच संबंधित अधिकाऱ्यास तात्काळ निलंबित करण्यात यावे अशी मागणी केली आहे. (Latest Marathi News)
परिसरात नेहमीच वीज वितरण विभागाच्या गलथन कारभारामुळे नागरिकांना विविध त्रासांना सामोरे जावे लागते असा आरोप करण्यात येत आहे. यापूर्वीच बहुतांश वेळा परिसरातील नागरिकांनी वीज वितरण कार्यालयामध्ये निवेदन देऊन समस्या सोडवण्या संदर्भात मागणी केलेली असताना, वीज वितरण विभागातर्फे जाणीवपूर्वक सर्व समस्यांकडे दुर्लक्ष केले जाते.
वीज वितरण विभागाच्या याच दुर्लक्षितपणामुळे या चिमुकल्याचा दुर्दैवी मृत्यू झाला. यास कारणीभूत असलेल्या वीज वितरण विभागाच्या अधिकाऱ्यांवर या संदर्भात कठोर कारवाई करावी, अन्यथा जनआंदोलन छेडण्याचा इशारा परिसरातील नागरिकांनी व नातेवाईकांनी वीज वितरण विभागाला दिला आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.