खड्ड्यांमुळे वाहतुक पोलिसांना असाही ताप; करावी लागतेच हमाली

धुळे : शहरामध्ये पडलेल्या खड्ड्यांच्या साम्राज्याचा फटका वाहनधारकांबरोबरच शहर वाहतूक विभागाच्या पोलिस कर्मचाऱ्यांना देखील बसतांना दिसून येत आहे. कांद्याने भरलेल्‍या गाडीचे टायर फुटले अन्‌ दोन्‍ही बाजूंनी रहदारी थांबली. मग काय तर वाहतूक पोलिसांना हमालीचे काम करावे लागले. (dhule-news-damage-road-pickup-van-puncher-and-dhule-traffic-police-help-onion-bag-side)

धुळे शहरातील संतोषीमाता चौकामध्ये मोठ्या प्रमाणात रस्त्यांवर खड्डे पडले आहेत. या खड्ड्यांमुळे कांद्याने भरलेला पिकअपचे टायर अचानक फुटले. सुदैवाने या दुर्घटनेमध्ये कुठल्याही प्रकारची जीवितहानी झाली नाही. मात्र टायर फुटल्याने कांद्याने भरलेले पिकअप वाहन रस्त्यातच अडकून पडल्याने वाहतुकीचा मोठा खोळंबा निर्माण झाला.

वाहतूक सुरळीत करण्यासाठी..

वाहन रस्त्यात अडकून पडल्यामुळे वाहतूक सुरळीत करणे कठीण होत असल्याने अखेर पोलिसांना टायर फुटलेले पिकअप वाहनामधील कांद्याच्या गोण्या स्वतः हमाली करीत वाहनातून काढून रस्त्याच्या किनारी नेऊन ठेवाव्या लागल्या. पिकअप वाहनातील सर्व कांद्याने भरलेल्या गोण्या पोलिसांनी वाहनातून काढून रस्त्याच्या बाजूला नेऊन ठेवल्यानंतर अखेर टायर फुटलेले पिकअप वाहन रस्त्याच्या कडेला केल्यानंतर वाहतूक पोलिसांना वाहतूक सुरळीत करता आली आहे.