युवासेनेची सायकल रॅली..पेट्रोल डिझेल दरवाढीबाबत केंद्र सरकारचा निषेध

धुळे : पेट्रोल डिझेल भाव वाढ संदर्भात केंद्र सरकारचा निषेध करण्यासाठी युवासेनेच्यावतीने धुळ्यात सायकल रॅली काढण्यात आली. यावेळी युवासेनेने इंधन दरवाढीचा निषेध करत केंद्र सरकारविरोधात घोषणाबाजी केली. (dhule-news-Yuvasena-cycle-rally-Central-government's-protest-against-petrol-and-diesel-price-hike)

युवासेनेकडून केंद्र सरकारच्या इंधन दरवाढ धोरणा विरोधात निषेध नोंदवण्यासाठी शिवस्मारक आग्रा रोड धुळे येथून सायकल रॅलीचे आयोजन करण्यात आले. शिवसेनेचे मंत्री तथा युवासेना प्रमुख आदित्य ठाकरे यांच्या आवाहनाला प्रतिसाद देत युवासेनेतर्फे इंधन दरवाढीविरोधात सायकल रॅली काढण्यात आली. या आंदोलनात मोठ्या संख्येने शिवसेनेचे व युवा सेनेचे पदाधिकारी उपस्थित होते. युवासेनेच्या या निषेध सायकल रॅलीमध्ये युवकांत बरोबरच मोठ्या संख्येने युवतींचा देखील सहभाग असल्याचे बघावयास मिळाले आहे.

मोदी सरकारचा निषेध

हेच का अच्छे दिन असा सवाल करत युवासेनेतर्फे इंधन दरवाढी विरोधात निषेध नोंदवण्यात आला. अच्छे दिनचा नारा देऊन केंद्रात विराजमान झालेल्या मोदी सरकारने दीपावलीच्या तोंडावर जनतेला महागाईच्या दरीत लोटून अधिक संकटात टाकले असल्याचा आरोप देखील यावेळी निषेध कर्त्यांकडून करण्यात आला. संपूर्ण राज्यामधील जनतेच्या मनातील आक्रोश केंद्र सरकारपर्यंत पोहोचवण्याकरिता युवसेनेच्यावतीने सायकल रॅली काढून आंदोलन करण्यात आले.