परभणीच्या लोअर दूधना धरणातून नदी पात्रात विसर्ग

परभणी : लोअर दुधना प्रकल्प (Lower dudhna Project) धरणाच्या पाणलोट क्षेत्रात मंगळवारी रात्री व बुधवारी (ता.१४) रोजी जोरदार पाऊस (Monsoon) झाला. जोरदार पावसामुळे धरणात मोठ्या प्रमाणावर आवक सुरू असल्याने या धरणाच्या १४ दरवाज्यातून १४,२८० क्युसेसने दूधना नदी पात्रात पाण्याचा विसर्ग करण्यात येत आहे.

तालुक्यातील लोअर दुधना प्रकल्पाच्या पाणलोट क्षेत्रात मंगळवारपासून जोरदार पाऊस पडत असल्यामुळे बुधवारी सकाळी दहा वाजेपर्यंत जलाशयात एकूण ८३ टक्के जलसाठा झाला उपलब्ध झाला आहे. त्यामध्ये अजून भर पडत आहे. त्यामुळे प्रकल्पात शंभर टक्के जलसाठा लवकरच होऊ शकतो. त्यामुळे धरणाचे द्वार क्र.०१ ते ०७ आणि १४ ते २० हे दरवाजे ०.३० मीटरने उघडण्यात आले असून, एकूण १०२०x१४ = १४,२८० क्यूसेक्सने दूधना नदी पात्रात पाण्याचा विसर्ग सोडण्यात आला आहे. लोअर दुधना प्रकल्प धरणाच्या खालील नदीकाठच्या गावातील नागरिकांनी सतर्क राहावे. नदीपात्रात उतरू नये, गुरेढोरे, विद्युत साहित्य, वैगरे असल्यास लागलीच काढून घ्यावे असे आवाहन पूर नियंत्रण कक्षाने केले आहे.

Edited By- Anuradha