पतीच्या दुसऱ्या शाही विवाह सोहळ्यात पहिल्या पत्नीचा राडा

मुंबई - वसईतल्या एका लग्न समारंभात  चित्रपटाला शोभेल असा प्रकार घडलेला पाहायला मिळाला. पतीच्या सुरू असलेल्या दुसऱ्या लग्नात पहिल्या पत्नीने धाड घालून राडा घेतला व अंतिम टप्प्यात सुरू असलेले लग्न मोडले. वसई पूर्वेच्या वसंतनगरी परिसरातील जोशी पार्टी हॉल मध्ये हा प्रकार घडला आहे. अर्जुन सिंग असे पतीचे नाव असून कांचन सिंग असे पहिल्या पत्नीचे नाव आहे. २०१२ मध्ये दोघांचा वैदीक पद्धतीने विवाह झाला होता. पतीने हवा तो हुंडाही घेतला, मात्र सहा महिन्यातच पतीने पत्नीला दूर केले. 

हे देखील पहा -

या दोघांच्या घटस्फोटाचा खटला न्यायालयात सुरू असताना काल रविवारी पती दुसरे लग्न करत असल्याचे पहिल्या पत्नीला समजले व तिने भर लग्न मंडपात येऊन राडा घातला. पत्नीने दाखवलेल्या या धाडसामुळे नवरदेवाच्या पहिल्या लग्नाचा भांडाफोड झाला व दुसरे लग्न होता होता थांबले. सुमारे दोन तास सुरू असलेल्या या राड्याची माहिती पोलिसांना मिळाल्यानंतर त्यांनी मध्यस्ती करत वातावरण शांत केले. पतीने केलेल्या या कृत्याबाबत त्यावर कठोर कारवाई करावी अशी मागणी पीडित पत्नीने केली आहे.

Edited By - Shivani Tichkule