नगरमध्ये सीना नदीला पूर, शेवगावात ढगफुटी

अहमदनगर ः गेल्या काही दिवसांपासून पावसाने उघडीप दिली होती. मात्र, काल रात्रीपासून जिल्ह्याला पावसाने झोडपले आहे. शेवगाव, पाथर्डी, नगर आणि कर्जत तालुक्यात अतिवृष्टी झाली आहे. या पावसाने खरिपाचे मोठ्या प्रमाणात नुकसान झाले आहे. सीना नदीसह अनेक नद्यांना पूर आला आहे. शेवगावातील अनेक गावांत पाणी शिरले आहे.

नगर शहरातून जाणाऱ्या सीना नदीला पूर आल्याने कल्याण-विशाखापट्टणम महामार्गावरील पूल पाण्याखाली गेला आहे. नगर तालुक्यातील उत्तरेकडील भागात अतिवृष्टी झाल्याने पिंपळगाव माळवीसह परिसरातील तलाव तुडुंब झाले आहेत.Flood of Sina river in Nagar district

शेवगाव तालुक्यातील कोरडगाव, आखेगाव, पागोरी पिंपळगाव, वाळुंज, खरडगाव, वरूर, भगूर आदी गावांत नदीचे पाणी शिरले आहे. या पावसाने खरिपाचे मोठे नुकसान झाले आहे. उडदाची काढणी सुरू असतानाच पाऊस आल्याने शेतकऱ्यांची तारांबळ उडाली आहे.

तिसगाव, मिरी व करंजी परिसरात काल रात्री झालेल्या जोरदार पावसाने या भागातील सर्वच तलाव, बंधारे व नाला बांध पूर्ण भरले आहेत. अनेक नद्यांना पूर आला आहे. मढी, शिरापूर आदी भागांमध्ये जोरदार पाऊस झाल्यामुळे वृद्धा नदीला आलेल्या पुरामुळे तिसगावमधील बाजार तळावरील करुणेश्वर मंदिरात पाणी घुसले. Flood of Sina river in Nagar district

सार्वजनिक बांधकाम विभागाच्या गेस्ट हाउसची भिंत कोसळली आहे, तर स्मशानभूमीची भिंत पडली आहे. तिसगाव शहराला पाणीपुरवठा करणाऱ्या पाची आंबी तलाव व खारोळ नाला तलाव पूर्ण क्षमतेने भरले आहेत. त्या वरच्या भागात असलेले दोन बंधारे फुटल्यामुळे पाणी शेतकऱ्यांच्या शेतात घुसून मोठ्या प्रमाणात शेतीचे नुकसान झाले आहे. रात्रभर झालेल्या पावसामुळे नद्यांना पूर आला होता, त्यामुळे मिरी-तिसगाव वाहतूक काही तासासाठी बंद होती.