Gadchiroli Accident News: दुचाकीवरून शाळेत निघाले, पण वाटेतच मृत्युने गाठलं; टिप्परच्या धडकेत शिक्षकाचा दुर्देवी अंत

Gadchiroli Accident News: गडचिरोली जिल्ह्यातून एक भयानक घटना समोर आली आहे. दुचाकीवरून शाळेत निघालेल्या आश्रम शाळेतील शिक्षकाला सुरजागड लोह खनिजाच्या अवजड ट्रकने जोरदार धडक दिली. या धडकेत शिक्षकाचा जागीच मृत्यू झाला आहे. वासुदेव कुळमेथे (४९ रा. गोमनी ) असे मृत शिक्षकाचे नाव आहे. या घटनेनं परिसरातून मोठी हळहळ व्यक्त होत आहे.  (Breaking Marathi News)

आलापल्ली येथील बँक ऑफ महाराष्ट्र समोर हा अपघात (Accident) घडला. शनिवारी (२० मे) दुपारी अडीच वाजताच्या सुमारास काटेपल्ली येथील भगवंतराव आश्रम शाळेत शिक्षक असलेले वासुदेव कुळमेथे हे आपल्या दुचाकीने चंद्रपूर मार्गावरील बँक ऑफ महाराष्ट्र समोरून जात होते.

दरम्यान, मागून येणाऱ्या भरधाव ट्रकने त्यांना धडक दिली. यात त्यांचा जागीच मृत्यू झाला. हा अपघात आलापल्ली येथील मुख्य चौकात घडल्याने ट्रकचालकाला नागरिकांनी पकडून ठेवले होते. सूरजागड येथून लोहखनिज वाहतूक करणाऱ्या अवजड वाहनांवर कुणाचेही नियंत्रण नसल्याने ते शहरातूनदेखील भरधाव जात असतात. (Latest Marathi News)

काही दिवसांपूर्वी असेच एका अवजड वाहनाने आष्टी येथे १२ वर्षीय मुलीला चिरडले होते. आता निर्दोष शिक्षकाला जीव गमवावा लागला. त्यामुळे सूरजागड लोहखनिज वाहतूक आणखी किती बळी घेणार, असा संतप्त सवाल नागरिकांनी उपस्थित केला आहे. शिक्षकाच्या मृत्युने परिसरातू हळहळ व्यक्त होत आहे.

Edited by - Satish Daud