Gondia Malaria Report: गोंदियात साथीच्या रोगांचा प्रकोप... मलेरियाने घेतला २ जणांचा बळी; जिल्ह्यात २०२ रुग्णांची नोंद

शुभम देशमुख, प्रतिनिधी...

Gondia News:

गोंदिया जिल्ह्यात सध्या विविध आजारांची साथ सुरू आहे. धक्कादायक बाब म्हणजे मलेरियामुळे दोघांचा जीव गेल्याची नोंद झाल्याने खळबळ उडाली आहे. एका महिन्यांत मलेरियाच्या २०२ रुग्णांची नोंद घेण्यात आली आहे. त्यामुळेच जिल्हावासीयांनी डासांपासून जास्त सावध राहण्याचे आवाहन आरोग्य विभागाकडून करण्यात आले आहे...

पावसाळा आला की साथीच्या आजारांचा सुळसुळाट वाढतो. राज्यातील अनेक जिल्ह्यांमध्ये डेंग्यू, मलेरियांसारख्या आजारांनी थैमान घातले आहे. गोंदिया जिल्ह्यात (Gondia) डोळ्यांची साथ जेमतेम आटोक्यात आली असतानाच आता तापाच्या साथीने डोके वर काढले आहे. यामध्ये व्हायरल, टायफॉईडचा ताप असतानाच आता मलेरियाच्या (Maleria) तापाने ताप वाढविला आहे.

जिल्ह्याला डासांचे ग्रहण असून, काही केल्या येथून डासांचा नायनाट करणे शक्य नाही अशी स्थिती आहे. ही बाब गोंदिया शहरापुरतीच लागू होत नसून, अवघ्या जिल्ह्यालाच डासांनी ग्रासून सोडले आहे. डासांपासून मलेरिया व डेंग्यूचा जास्त प्रमाणात धोका दिसून येतो.

त्यातही डेंग्यू (Dengue) म्हणताच भल्याभल्यांच्या अंगाला घाम फुटतो. मात्र, जिल्ह्यात डेंग्यूपेक्षा मलेरियाच जास्त जीवघेणा ठरत आहे. मलेरिया मुळे दोघांचा जीव गेला असुन मलेरियाचे २०२ रुग्णांची नोंद करण्यात आली आहे. साथीच्या रोगांच्या वाढत्या प्रभावामुळे काळजी घेण्याचे आवाहन आरोग्य विभागाकडून करण्यात आले आहे. (Latest Marathi News)