Imtiyaz Jaleel : मी औरंगाबादचा खासदार आहे आणि राहणार! इम्तियाज जलील यांचं विरोधकांना थेट आव्हान

Imtiyaz Jaleel : मुंब्रा येथे एमआयएमचं राष्ट्रीय सम्मेलन पार पडलं. यावेळी बोलताना संभाजीनगरचे खासदार इम्तियाज जलील यांनी विरोधकांवर जोरदार हल्लाबोल केला. दोन मिनिटात कशी टी-20 खेळली जाते, हे मी असदुद्दीन ओवेसी यांच्यासोबत राहून शिकलो आहे. त्यामुळे औरंगाबादचा खासदार मीच आहे आणि मीच राहणार असे म्हणत इम्तियाज जलील यांनी विरोधकांना थेट आव्हानच दिले. मी औरंगाबाद शहरातच जन्मलो आणि औरंगाबादमध्ये मरणार असेही ते म्हणाले.

औरंगाबादच्या नामांतरावरून देखील जलील यांनी विरोधकांवर हल्लाबोल केला. ते म्हणाले, माझ्या औरंगाबादचे नाव बदलण्यासाठी खूप फडफड करत आहे. देवेंद्र म्हणतात मी केले, एकनाथ शिंदे म्हणतात मी केले आणि ज्यांचे नाव आणि निशाणी सर्व गेले ते देखील म्हणतात की मी केले, असे म्हणत त्यांनी भाजप आणि शिवसेनेसह उद्धव ठाकरेंवर देखील टिका केली.

जलील म्हणाले, मी म्हणालो तुमच्याकडे ताकत आहे तर नाव बदला, त्यानंतर महाराष्ट्रात माझे पुतळे जाळले जात आहे. इम्तियाज जलील हाय हाय असे नारे लावले जात आहेत पण 2024 नंतर यांना बाय बाय म्हणावं लागणार आहे. (Latest Marathi News)

पठाणांना थाबवणं सोपं काम नाही. तुम्ही प्रयत्न करून पाहिला. चित्रपट पाहू नका असे सांगितले. पण पाहता पाहता तो पठाण हजार कोटी घेऊन गेला आणि आता तुम्ही या पठाणला अडवत आहात. तुमच्याकडे खूप पैसे असतील, पण पैसे वाटून तुम्ही वाघाच्या बछड्यांना विकत घेऊ शकत नाही, असे यावेळी बोलताना जलील म्हणाले.