अकोल्यात रात्रीची संचारबंदी वाढवली; आता 23 नोव्हेंबर पर्यंत संचारबंदी

अकोला : अकोला शहरातील कायदा सुव्यवस्था अबाधित राखण्यासाठी संपूर्ण अकोला शहरात कलम 144 जारी करण्यात आले असून 23 नोव्हेंबर रात्रीची संचारबंदी वाढवण्यात आली आहे. ही संचारबंदी रात्री नऊ ते सकाळी सहा वाजेपर्यंत असणार आहे. असे आदेश उपविभागीय दंडाधिकारी डॉ. निलेश अपार यांनी आज निर्गमित केले.

हे देखील पहा :

आदेशात दि.२३ रोजी पर्यंत संचारबंदीत वाढ करण्यात आली आहे. त्यानुसार दि. २३ रोजी सकाळी सहा वाजेपर्यंत रात्री नऊ ते सकाळी सहा या वेळात संचारबंदी लागू करण्यात आली आहे. याकालावधीत आरोग्य सेवा, कोविड लसीकरण सत्र सुरु राहतील. तसेच या कालावधीत धार्मिक तेढ वाढविणारे, भावना भडकविणारे असे कृत्य, वक्तव्य, अफवा पसरविण्यास मज्जाव करण्यात आला आहे.

समाज माध्यमांद्वारे असे संदेश प्रसारित करण्यासही बंदी घालण्यात आली आहे. कोणत्याही प्रकारे रॅली, धरणे, मोर्चे व अन्य कार्यक्रमांचे आयोजन होणार नाही. निवडणूक प्रचार संबंधित कार्यक्रम असल्यास त्यास निवडणूक निर्णय अधिकाऱ्यांची परवानगी घेणे बंधनकारक आहे. या आदेशाचा भंग झाल्यास कायदेशीर कारवाई करण्यात येईल,असेही आदेशात स्पष्ट करण्यात आले आहे.

Edited By : Krushnarav Sathe