गिरणा धरणाची शंभरी; सात गेटमधून साडेसात हजार क्युसेकने विसर्ग

भडगाव (जळगाव) : गिरणा धरणाने सलग तिसऱ्या वर्षी शंभरी गाठली. त्यामुळे गिरणा पट्ट्यात शेतकऱ्यांमध्ये आनंदाचे वातावरण पहायला मिळाले. सकाळी सात वाजता धरणाने शंभरी गाठली. सध्या धरणातुन 7500 क्युसेकने पाण्याचा विसर्ग सुरू असल्याचे उपविभागीय अभियंता हेमंत पाटील यांनी सांगीतले. (Jalgaon-news-girna-dam-water-lavel-hundred-parcantag-full-morning-sevan-get-open)

गिरणा धरणाने आज सकाळी सात वाजता शंभरी गाठली. पाणलोट क्षेत्रातील धरणातुन मोठ्याप्रमाणात पाण्याची आवक असल्याने रात्रीतुन धरणात तब्बल 6 टक्के पाण्याचा साठा वाढला. सात वाजता सुरवातीला चार गेट एका फुटाने वर करत पाच हजार क्युसेक पाण्याचा विसर्ग सुरू करण्यात आला होता. मात्र पुन्हा धरणात पाण्याची आवक वाढल्याने सात दरवाज्यातुन साडेसात हजार क्युसेकने पाण्याचा विसर्ज सुरु करण्यात आला. तर मन्याड प्रकल्पातुन साधारण 10 हजार क्युसेकने विसर्ग सुरू आहे.

गिरणा नदी पात्रात मोठ्या प्रमाणात विसर्ग

गिरणा नदी पात्रात साडे सतरा हजाराच्या जवळपास क्युसेकने पाण्याचा फ्लो सुरू आहे. त्यामुळे नागरीकांनी सतर्क राहावे, नदि काठी जाऊ नये; असे आवाहन पाटबंधारे विभागाचे कार्यकारी अभियंता श्री. अग्रवाल, उपविभागीय अभियंता हेमंत पाटील, शाखा अभियंता एस.आर.पाटील यांनी केले आहे.