Sangli : सतर्क राहा ! कृष्णा नदीचे पाणी वाढतेय, पुराच्या धोक्यामुळे काठावरील नागरिकांना इशारा

Krishna River : कृष्णा आणि वारणा नदीच्या पाणी पातळीत वाढ झाल्याने सांगली (sangli) जिल्ह्यातील तीन पूल आणि तेरा बंधारे पाण्याखाली गेले आहेत. ज्या ठिकाणी बंधाऱ्यावरती पाणी आले आहे तेथे पोलिसांनी बॅरेकट लावलेले आहेत. दरम्यान कृष्णा नदीच्या पाणी पातळीत सातत्याने वाढ हाेत असल्याने सांगली महापालिका प्रशासनाने नागरिकांना पाणी वाढण्याच्या आत स्वतः हुन स्थलांतर व्हावे असे आवाहन केले आहे. (Sangli Rain Update)

राज्यभरात विशेषत: पश्चिम महाराष्ट्रात गेल्या पाच दिवसांपासून पावसाची संततधार सुरु आहे. सांगली जिल्ह्यात देखील जाेरदार पाऊस बरसत आहे. यामुळं कृष्णा नदीच्या पाणी पातळीत झपाट्याने वाढ झाली आहे. येथील कृष्णा नदीची पाणी पातळी अठ्ठावीस फुटांवर पाेहचली आहे. कृष्णेची इशारा पातळी 40 फुटांवर आहे तर धाेक्याची पातळी 45 फुट असल्याचे प्रशासनाने नमूद केले.

दूसरीकडं अलमट्टी धरणातून दोन लाख क्यूसेक पाण्याचा विसर्ग केला जात आहे. यामुळं सांगलीकरांना दिलासा मिळाला आहे. दरम्यान पावसामुळं (Rain) जिल्ह्यातील तीन पूल आणि तेरा बंधारे पाण्याखाली गेले आहेत.

कृष्णा आणि वारणा नदीच्या पाणी पातळीत वाढ झाली आहे. परिणामी आजूबाजूच्या शेतात पाणी शिरलं आहे. त्याचा फटका शेतकऱ्यांना बसत आहे. बहुतांश शेतक-यांच्या शेतीचं नुकसान झालं आहे.

Edited By : Siddharth Latkar