Maharashtra Politics : निवडणूक आयोगासह एकनाथ शिंदेंना दणका! सुप्रीम कोर्टाने बाजावली नोटीस...

Thackeray vs Shinde : माजी मुख्यमंत्री उद्धव ठाकरे यांच्या गटाच्या याचिकेवर आज सर्वोच्च न्यायालयात सुनावणी झाली. मुख्यमंत्री एकनाथ शिंदे यांच्या गटाला शिवसेना म्हणून मान्यता देण्याच्या निवडणूक आयोगाच्या निर्णयाला ठाकरे यांनी सुप्रीम कोर्टात आव्हान दिले आहे.

यावरील सुनावणी दरम्यान कोर्टाने निवडणूक आयोग आणि शिवसेना (शिंदे गट) यांना नोटीस बजावली आहे. या प्रकरणात सुप्रीम कोर्टाने दोघांकडून उत्तरे मागवले आहेत. याप्रकरणावरील पुढील सुनावणी आता दोन आठवड्यानंतर होणार आहे.

मुख्यमंत्री एकनाथ शिंदे यांच्या नेतृत्त्वातील शिवसेना व्हीप बजावून ठाकरे गटाच्या आमदारांना अपात्र ठरवणार का असा प्रश्न गेल्या काही दिवसांपासून उपस्थित केला जात होता. या प्रश्नावरून अनेक उलटसुलट चर्चा सुरू होत्या. परंतु आता सुप्रीम कोर्टात ठाकरे गटाला मोठा दिलासा मिळाला आहे. (Latest Marathi News)

आगामी अर्थसंकल्पीय अधिवेशनात शिवसेनेने व्हीप लागू केला तरी तो ठाकरे गटातील आमदारांना लागू होणार नाही, तसेच त्या आधारावर ठाकरे गटाचे आमदार अपात्र देखील होणार नाहीत. याशिवाय सुप्रीम कोर्टात निवडणूक आयोगाच्या निकालावर दोन आठवड्यानंतर सुनावणी होणार आहे. तोपर्यंत ठाकरे गटाला मिळालेले 'उद्धव बाळासाहेब ठाकरे' नाव आणि मशाल चिन्ह कायम राहणार आहे. (Latest Political News)