ऋतूंप्रमाणे बदलतात राज ठाकरेंचे विचार; कधीच नसतात एका मतावर ठाम - गुलाबराव पाटील

जळगाव : राज ठाकरे यांचे विचार ऋतू बदलतात त्या प्रमाणे बदलत असतात ते कोणत्याही एका विचारावर ठाम राहत नाहीत अशी टीका मंत्री गुलाबराव पाटील (Gulabrao Patil) यांनी केली आहे. तसेच राज ठाकरेंनी एका विचारावर ठाम राहायला हवे असा सल्लाही पाटील यांनी दिला. राज ठाकरे (Raj Thackeray) कधी परप्रांतीयांचा मुद्दा उचलला, नंतर हेच परप्रांतीय भारतीयच असल्याची जाणीव झाल्यानंतर त्यांनी मराठीचा मुद्दा सोडला. त्यानंतर पुन्हा त्यांनी मराठी मुद्दा पुढे आणला मात्र त्यात त्यांना पाहिजे तसे यश मिळाले नसल्याने आता त्यांनी हिंदुत्वाचा मुद्दा पुढे आणला असल्याचे गुलाबराव पाटील म्हणाले. (Gulabrao Patil on Raj Thackeray)

हे देखील पहा :

मागील काळात राज ठाकरे यांची भाषणे ही काँग्रेस (Congress) आणि राष्ट्रवादी (NCP) पक्षाला सपोर्ट करणारी आणि पंतप्रधान मोदी (PM Modi) यांच्यावर टीका करणारी असल्याचं पाहायला मिळाले होते. काही सांगता येत नाही पुढील सहा महिन्यात अजून ते काय पुढे आणतील, त्यांचे विचार नेहमी ऋतू बदलावे तसे राहिले असून मनसे आणि राज ठाकरे यांचे सातत्याने बदलणारे विचार पाहता पक्ष आणि ते दिशाहीन झाल्याचं वाटत आहे. ज्यांच्या कडे दिशा असते ते कधीच आपली ध्येयधोरणे बदलत नसतात, मनसेला यश मिळत नसल्याने पुन्हा त्यांनी शिवसेनेच्याच हिंदुत्वाचा मुद्दा पकडला असल्याची बोचरी टीकाही गुलाबराव पाटलांनी केली.

राज ठाकरे यांनी सातत्याने आपल्या भूमिका बदलू नये, त्यांच्या सारख्या नेत्याला हे शोभत नाही. मरेपर्यंत कोणत्यातरी एका भूमिकेवर त्यांनी ठाम राहायला हवे. शिवसेनेवर टीका केल्याशिवाय कोणाचं पोट भरत नाही. अनेक जण शिवसेना (Shivsena) सोडून गेले मात्र जे गेले त्यांची काय अवस्था आहे हे आपल्याला माहीत आहे. त्यामुळे राज ठाकरे यांनी आपला एक मुद्दा कायम ठेवावा ,कारण भरकटणारी नाव कधीच नय्या पार करू शकत नसल्याचेही मंत्री गुलाबराव पाटील यांनी म्हटलं आहे.

Edited By : Krushnarav Sathe