बारामतीत महावितरणकडून कृषीपंपाचे वीज कनेक्शन तोडण्याची मोहीम सुरू

बारामती : थकीत वीज बिल न भरल्यामुळे महावितरणकडून शेतकऱ्यांचे कृषीपंप वीज कनेक्शन तोडण्याची मोहीम बारामतीत तेजीत आहे. कोणतीही पूर्वसूचना न देता कृषिपंपाची वीज खंडित केल्यामुळे आक्रमक झालेल्या शेतकऱ्यांनी बारामती तालुक्यातील सुपे येथील महावितरणच्या उपकेंद्रासमोर ठिय्या आंदोलन केले. वीज पुरवठा पूर्ववत होत नाही तोपर्यंत कार्यालयासमोरून हटणार नाही, असा आक्रमक पवित्रा शेतकऱ्यांनी घेतला आहे.

हे देखील पहा -

एकीकडे पावसाने दडी मारल्याने शेतकरी चिंतेत असताना दुसरीकडे महावितरणने कोणत्याही प्रकारची पूर्वकल्पना न देता अचानक कृषिपंपांचा वीजपुरवठा खंडित करण्याचा सपाटा सुरू केला आहे. त्यासाठी ट्रांसफार्मरचा विज पुरवठा खंडित करण्याचे आदेश मुख्य अभियंता सुनील पावडे यांनी दिले आहेत.

त्यानुसार सुपे परगण्यातल्या कृषिपंपांचा वीजपुरवठा खंडित करण्यात आला आहे. मात्र, वीज बिलाची सवलत मिळावी, तसेच विज बिल भरण्यासाठी सुलभ हप्त्यांची सोय असावी, या मागणीसाठी भाजपा नेते दिलीप खैरे यांच्या नेतृत्वाखाली आज सुपे येथील महावितरण कार्यालयामोर ठिय्या आंदोलन करण्यात आले.

Edited By : Krushnarav Sathe