नागपूर: पत्नीचा गळफास घेत तर पतीचा विष प्राशन करत आत्महत्येचा प्रयत्न! पत्नीचा मृत्यू

मंगेश मोहिते

नागपूर: कपिल नगरच्या बाबा दिपसिंग गुरूद्वारामागे पती प्रफुल सहारे आणि त्याची पत्नी रितू सहारे  आपल्या दोन मुलांसह राहत होते. मात्र आज सगळी जे घडलं ते पाहून परिसर हादरला आहे. पत्नी गळफास घेत लटकलेली तर पतीने विषारी औषध घेत, पडलेल्या अवस्थेत आढळून आले आहेत.

आज सकाळी साडेदहाच्या सुमारास दोघेही खोलीबाहेर न आल्याने प्रफुल्लचा भाऊ प्रशांत याला शंका आली. त्याने त्यांच्या खोलीचे दार ठोठावले. मात्र, प्रतिसाद मिळत नसल्याने त्याने दार तोडले. यावेळी प्रफुल्ल सहारे यांच्या तोडांतून फेस येत होता. याशिवाय वहिनी रितू सहारे या ओढणीच्या साहाय्याने गळफास घेतल्याने लटकलेल्या अवस्थेत आढळून आल्या. या प्रकाराने घरात एकच खळबळ उडाली. 

या सर्व घटनेची माहिती कपिलनगर पोलिसांना देण्यात आली. त्यांनी तत्काळ घटनास्थळी दाखल होत रितू सहारे यांचा मृतदेह ताब्यात घेऊन उत्तरीय तपासणीसाठी पाठविला. तसेच प्रफुल्ल सहारे यास रुग्णालयात दाखल करण्यात आले. याबाबत प्राथमिक चौकशी केली असता, आज सकाळी दोघांमध्ये काही कारणाने भांडण झाल्याची माहिती समोर येत आहे. त्यातून प्रफुल्लने त्याच्या पत्नीची हत्या करीत स्वतः विष प्राशन केल्याची शंका व्यक्त करण्यात येत आहे. मात्र, त्याच्यावर उपचार सुरू असल्याने अद्याप कोणते कारण आहे हे स्पष्ट झाले नाही. पोलिसांनी गुन्हा दाखल केला असून तपास सुरू केला आहे.

हे देखील पाहा-

पती पत्नीने आत्महत्या केली? की तो घातपात आहे याचा खुलासा पोस्ट मार्टम रिपोर्ट नंतर आणि पतीला शुद्ध आल्यानंतरच होऊ शकेल, मात्र या घटनेमुळे परिसरात हळहळ व्यक्त होत आहे.