चोरट्याने युट्यूबवरून घेतले टाळे तोडायचे धडे; केली १० लाखांची घरफोडी

चेतन इंगळे

विरार : अनेकजण युट्यूबचा माहितीचा स्त्रोत्र म्हणून आधार घेतात.तर युट्यूब माध्यमाचा अनेकजण मनोरंजन, शैक्षणिक माहितीसाठी युट्यूबचा आधार घेतात. मात्र नालासोपाऱ्यातील आचोळ्यात एकाने युट्यूबवरून घराचे टाळे कसे तोडायचे याचे धडे घेत १० लाखांची घरफोडी (Robbery) केली आहे. या आरोपीला आचोळे पोलिसांनी उत्तर प्रदेशवरून (Uttar Pradesh) अटक केली आहे.

मिळालेल्या माहितीनुसार, नालासोपाऱ्यातील चोरट्याने युट्यूबवरून घराचे टाळे कसे तोडायचे याचे धडे घेवून १० लाखाची घरफोडी केली. त्याने नालासोपाऱ्यातील रश्मी रेसिडेन्सी या इमारतीत घरात घुसून १० लाखाचे दागिन्यांची चोरी केली. त्यामुळे चोरीच्या घटनेने नालासोपारा परिसरात खळबळ उडाली होती. त्यानंतर पीडित कुटुंबाने पोलिसात तक्रार दाखल केली. घरफोडी करून हा चोरटा फरार झाला होता. त्याचा शोध पोलिसांकडून सुरू होता. मात्र, आता फरार झालेल्या आरोपीला आचोळे पोलिसांनी उत्तर प्रदेशवरून अटक केली आहे. त्याच्याकडून ९ लाख ७५ हजाराचा मुद्देमाल जप्त केला आहे.

पोलिसांनी दिलेल्या माहितीनुसार, नालासोपारा आचोळे परिसरात राहणारा आरोपी दिलशान शेख (३८) याने युट्यूबवरून चोरीचे धडे घेतले. त्यानंतर परिसरात रश्मी रेसिडेन्सी या इमारतीत घरात घुसून १० लाखाचे दागिने आणि रोकड घेऊन लंपास झाला होता. घटनास्थळावरील सीसीटीव्ही कॅमेऱ्यातून आरोपीचे वर्णन आणि पत्ता मिळवला. त्यानंतर आरोपीला पकडण्यासाठी पोलिसांनी दोन पथके तयार केले. एक पथक गुजरात आणि दुसरे पथक उत्तर प्रदेश येथे रवाना करण्यात आली. त्यानंतर पोलिसांनी उत्तर प्रदेशमधून आरोपीच्या मुसक्या आवळल्या. आरोपीने ही पहिलीच चोरी केली होती, अशी माहिती पोलीस निरीक्षक चंद्रकांत सरोदे यांनी दिली आहे.