Navapur News: चेकनाक्यावर पाचशेची लाच घेताना पकडले; कागदपत्र ओके असतानाही पैशांची मागणी

नवापूर (नंदुरबार) : वाहन व चालकाची सर्व कागदपत्रे असतानाही सीमा तपासणी नाक्यावर गुजरातहून (Gujrat) महाराष्ट्रात प्रवेशासाठी अनावश्यक पैशाची मागणी केल्याने (Nashik) नाशिक येथील लाचलुचपत प्रतिबंधक विभागाने कारवाई केली. पाचशे रुपयांची (Bribe) लाच घेताना पंटरला पकडले. (Tajya Batmya)

पंटरला लाच घेण्यासाठी प्रोत्साहन दिल्यामुळे मोटार वाहन निरीक्षकांनाही दोषी धरले. याबाबत नवापूर पोलिस ठाण्यात दोघांविरोधात गुन्हा दाखल करण्याचे काम सुरू आहे. पंटरचे नाव विजय मगण मावची (वय ४०) असे असून मोटार वाहन निरीक्षक महेश हिरालाल काळे (३८, रा. नाशिक) यांनी पंटरला लाच घेण्यासाठी प्रोत्साहित केले.

तक्रारदार ट्रकचालक गुजरातमधून राज्याच्या हद्दीत ट्रकसह प्रवेश करत असताना नवापूर सीमा तपासणी नाक्यावरील खासगी पंटर विजय मावची याने सर्व कागदपत्रे व्यवस्थित असतानाही तक्रारदाराकडे ५०० रुपयांची मागणी करून तिचा स्वीकार केला. मोटार वाहन निरीक्षक महेश काळे यांनी विजय मावची यास लाच घेण्यासाठी प्रोत्साहन दिले म्हणून त्यांच्याविरुद्ध नवापूर पोलिस ठाण्यात गुन्हा दाखल करण्याचे काम सुरू आहे.

सापळा अधिकारी नाशिक येथील लाचलुचपत प्रतिबंधक विभागाच्या पोलिस निरीक्षक साधना इंगळे यांच्या पथकात हवालदार प्रफुल्ल माळी, प्रकाश डोंगरे यांनी ही कारवाई केली. दरम्यान, नवापूर पोलिसांनी मात्र सायंकाळी सातपर्यंत गुन्हा दाखल करण्यासाठी कुणीही आलेले नाही, असे सांगितले. दरम्यान, येथील तपासणी नाक्यावर आजपर्यंत अनेक कारवाया झाल्या आहेत. मोटार वाहन निरीक्षकाची जबाबदारी असताना खासगी व्यक्ती पंटरला पुढे करून त्याच्यावर गुन्हा दाखल करण्यात येतो. त्यामुळे यात कुणाला वाचविण्यासाठी प्रयत्न होतात, हे उघड गुपित राहिले आहे.