Nashik Accident News: गणपती आणायला गेलेल्या भाविकांना कारची जोरदार धडक; ५ ते ६ गणेशभक्त जखमी

Nashik News:

देशभरात सर्वत्र गणपती बाप्पाचे आगमन झाले आहे. घरोघरी बाप्पा विराजमान झाल्याने जल्लोष व्यक्त केला जात आहे. अशात नाशिकमध्ये एक दुर्घटना घडली आहे. नाशिकच्या मनमाडमध्ये सुसाट कारने गणेश मूर्ती घेण्यासाठी गेलेल्या भक्तांना धडक दिली आहे. (Latest Marathi News)

मिळालेल्या अधिक माहितीनुसार, गणेश मूर्ती घेण्यासाठी ५ ते ६ गणेश भक्त आले होते. त्यांच्यासह एक चिमुकली देखील होती. या सर्वांना कारची जोरदार धडक बसली आहे. कारचा वेग इतका जास्त होता की, रस्त्यावर असलेल्या इतर ४ ते ५ दुचाकींचे नुकसान झाले आहे.

कार चालक नांदगावचा असल्याची माहिती मिळाली आहे. गणेश मूर्ती घेऊन नांदगावकडे जात असताना नियंत्रण सुटल्याने हा अपघात झाला. अपघातानंतर कार चालकाला पोलिसांनी ताब्यात घेतले असून, जखमींवर मनमाड व मालेगावातील खासगी रुग्णालयात उपचार सुरू आहे.