Nashik Crime News: सोशल मीडियावरवर लाईव्ह येत शिवीगाळ; वाद सोडवण्यासाठी गेलेल्या मित्राचाच खून

तबरेज शेख

नाशिक : इंस्टाग्राम फेसबुकवर लाइव करुन शिवीगाळ केल्याच्या कारणावरून मित्रांचे झालेले भांडण सोडवायला गेलेल्या तरुणाचा खून झाल्याची घटना (Nashik) नाशिकमध्ये समोर आली आहे. पोलीस तपासात हे कारण पुढे आले आहे. मारहाणीची ही घटना सीसीटीव्‍ही (CCTV) कॅमेरात कैद झाली आहे. (Maharashtra News)

नाशिकमध्‍ये झालेल्‍या घटनेचा पोलिसांनी सीसीटीव्‍हीच्‍या आधारे तपासाला सुरवात करून ९ जण ताब्यात घेतले आहेत. यात ६ जण हे अल्पवयीन आहेत. सिड़को परिसरातील सावतानगर येथे ही घटना घडली आहे. परशुराम बाळासाहेब नजान हा तरुण सावतानगर येथील एका हॉटेलमध्ये जेवण करण्यासाठी आला होता. त्याच्यासोबत असलेल्या मित्राचे आणि संशयीत यांच्यात फेसबुकवर लाईव्ह येऊन शिवीगाळ केल्याच्या कारणावरून वाद (Crime News) झाला. या वादाचे पर्यावसन हाणामारीत झाले.

वाद सोडवायला गेला अन्‌

मित्राचे हे भांडण सोडवण्यासाठी परशुरामने मध्‍यस्‍थी केली. त्यामुळे मारहाण करणाऱ्या संशयीतांपैकी काहींनी रस्त्यात पडलेला पेवरब्लॉक परशुरामच्या डोक्यात माराला. या मारहाणीत परशुराम याला गंभीर मार लागल्याने अतिरक्तस्राव झाल्याने त्याला रुग्णालयात दाखल करण्यात आले. मात्र उपचारादरम्यान परशुरामचा मृत्यू झाला आहे. याबाबत नाशिकच्या अंबड पोलीस ठाण्यात खुनाचा गुन्हा दाखल करण्यात आला असून अंबड पोलीस अधिक तपास करत आहे.