Sanjay Raut News: संजय राऊतांच शिंदे गटाला ओपन चॅलेंज; म्हणाले, 'खरंच मर्द असाल तर...'

Thane News: सोमवारी शिंदे आणि ठाकरे गटाच्या नेत्यांमध्ये जोरदार राडा झाला. शिवसेना शाखेवरून दोन्ही गटात हाणामारी झाली. या सर्वांवर खासदार संजय राऊत यांनी प्रतिक्रिया दिली आहे.'ज्याप्रकारे पोलीसांचा आणि सत्तेचा वापर करून काही गोष्टी ओरबाडून नेल्या जात आहेत. जे जे जाईल ते सर्व आम्ही परत मिळवू. या सर्व गोष्टी काही दिवसांसाठी आहेत.त्यानंतर ही सत्ता आणि दादागिरी देखील राहणार नाही. आमच्या लोकांना दाबण्यासाठी पोलिसांचा वापर केला जात आहे. म्हणजेच तुम्ही घाबरले आहात. खरंच मर्द असाल तर समोर या आणि आमच्याशी लढा..., तेव्हा बघून घेऊ, असं तोंडसुख संजय राऊतांनी घेतलं आहे. (Latest Sanjay Raut News)

“हे फक्त ठाण्यातच चाललंय. शिंदे गटाचं अस्तित्व ठाण्यात आहे. स्वत:ला शिवसैनिक म्हणवणाऱ्यांचं हे काम नाही.असाल मर्द तर या समोर, पोलिसांच्या आड उभे राहून हल्ले करू नका. खेडच्या सभेनंतर सगळ्यांच्या पायाखालच्या जमिनी सरकल्या आहेत. चिंचवडमध्ये भाजपचा विजय नाही. आमचा शिवसैनिक कधीच मागे हटणार नाही, असं संजय राऊत म्हणाले.

भाजप शिंदे गटाचा वापर करत आहे

भाजप शिंदे गटाचा फक्त वापर करत आहे असं सांगत राऊत पुढे म्हणाले की, 'ठाण्यात सुरू असलेला प्रकार थांबवा, सत्ता आज आहे उद्या नाही. भाजप तुमचा वापर करत आहे, हे तुम्हाला भविष्यात कळेल की तुम्ही किती मोठी चूक केली आहे. पोलिसांचा वापर करून जर तुम्ही शिवसैनिकांना थांबवत असाल, तर या गोष्टी मुख्यमंत्रीपदाला शोभणाऱ्या नाहीत, अशी टीका राऊतांनी मुख्यमंत्री शिंदेंवर केली आहे.

रंगावर कोणाचीही मक्तेदारी नाही

सर्व रंगावर कोणत्याही व्यक्तीची मक्तेदारी नाही. शिवसेनाप्रमुखांनी आम्हाला भगव्यावर प्रेम करायला शिकवलं आहे. त्यामुळे भगवा आम्हाला प्रियच आहे, असंही संजय राऊत म्हणाले. शिवसेनेच्या दोन गटांमध्ये सध्या शाखांवरून वाद होताना दिसत आहे. सोमवारी शिवाई नगर शिवसेना शाखेचं कुलूप तोडून शिंदे गटाने त्याचा ताबा घेतला. त्यामुळे दोन्ही गटांमध्ये हाणामारी झाली.