मोठी बातमी! राज्यसभेचं मतदान सुरू होताच महाविकास आघाडीने आखला नवा प्लॅन

मुंबई : संपूर्ण राज्याचं लक्ष लागून असलेल्या राज्यसभा निवडणुकीच्या मतदानाला (Rajya Sabha Election voting) सुरूवात झाली आहे. आतापर्यंत भाजपच्या 20 आमदारांनी मतदान केलं आहे. अशातच महाविकास आघाडीने नवा प्लॅन आखला आहे. पहिल्या टप्प्यात महाविकास आघाडीचे 42 आमदार मतदान करणार आहे. तर, बाकी मतं राखून ठेवणार आहे. दुपारी एकूण मतदानाचा आढावा घेऊन उर्वरित मतं ही शिवसेनेचे संजय पवार यांना दिली जाणारा आहे. (Rajya Sabha Election 2022 Latest Marathi News)

विशेष बाब म्हणजे, आज सकाळपासून महाविकास आघाडीच्या नेत्यांना मतदानाबाबत पत्रकारांनी विचारलं असता, पहिल्याच फटक्यात आमचे चारही उमेदवार निवडूण येणार असं महाविकास आघाडीच्या नेत्यांनी सांगितलं होतं. मात्र आता त्यांनी नवा डाव खेळला आहे. पहिल्या टप्प्यात महाविकास आघाडीचे 42 मतदार हे मतदान करणार आहे. तसेच इतर मतं ही राखून ठेवण्यात येणार आहे. (Uddhav Thackeray News)

सविस्तर सांगायचं झालं तर, कॉंग्रेसकडे जी 44 मतं आहे यापैकी 42 मतं आपल्या उमेदवाराला देईल, त्यानंतरची उरलेली 2 मतं ही राखून ठेवण्यात येईल. राष्ट्रवादीकडे 53 मतं आहेत यातील पहिली 42 मतं ते प्रफुल्ल पटेल यांना देणार असून 9 मतं राखून ठेवणार आहे. तर शिवसेनेकडील 56 मतांपैकी अगोदर 42 मतदार मतदान करणार आहे. तर उरलेली मतं ही राखून ठेवण्यात येणार आहे.

दरम्यान, दुपारच्या टप्प्यात सर्व पोलिंग एजंट मतांचा आढावा घेणार आहे. नेमकी आपली किती मतं झाली. आपलं कुठलंही मतं वाया गेलं नाही ना... याची खात्री केली जाणार आहे आणि त्यानंतर तिनही पक्षाकडे उरलेली जी अधिकची मतं आहे, ती सर्वच मतं शिवसेनेच्या दुसऱ्या उमेदवाराला म्हणजेच संजय पवार यांना देण्यात येणार आहे. त्यामुळे मतांचे व्यवस्थित नियोजन होईल, आणि आपले चारही उमेदवार निवडून येतील अशी अपेक्षा महाविकास आघाडीला आहे.

राज्यसभेच्या सहाव्या जागेसाठी शिवसेना आणि भाजपमध्ये चुरशीची लढत आहे. विजयासाठी पहिल्या पसंतीच्या उमेदवाराला ४१.०१ मतांची आवश्यकता आहे. अशातच अतिरिक्त उमेदवार निवडून आणण्यासाठी दोनही पक्षांना अपक्ष व छोट्या पक्षांची गरज लागणार आहे. अपक्ष व छोट्या पक्षांचे २९ आमदार असून, ते कोणती भूमिका घेतात यावर शिवसेना व भाजपचे भवितव्य अवलंबून आहे.

Edited By - Satish Daud