बलात्काराच्या आरोपीची पोलीस कोठडीत आत्महत्या !

अमरावती : अल्पवयीन मुलीवर बलात्कार केल्याचा गुन्हा दाखल असलेल्या आरोपीने पोलीस कोठडीत आत्महत्या केल्याने अमरावती शहर पोलीस दलात एकच खळबळ उडाली आहे. मिळालेल्या माहितीनुसार अमरावतीच्या फ्रेझरपुरा पोलीस स्टेशनमध्ये सागर श्रीपत ठाकरे (वय 24,रा.खंबीत, ता. आष्टी, जि. वर्धा ) या युवकावर अल्पवयीन मुलीला पळवून नेल्याचा गुन्हा दाखल होता.

हे देखील पहा -

पोलिसांनी या प्रकरणाचा तपास करून सदर मुलीला परत आणले. त्यानंतर मुलीच्या तक्रारीवरून सागरवर बलात्काराचा गुन्हा दाखल करण्यात आला. सदर गुन्ह्यात चौकशी करण्यासाठी पोलिसांनी सागरला अमरावतीमध्ये बोलवले व त्याला अटक केली. फ्रेझरपुरा पोलीस स्टेशनमध्ये लॉकअपची व्यवस्था नसल्याने सागरला काल राजापेठ पोलीस स्थानकातील लॉकअप मध्ये ठेवण्यात आले.

त्यानंतर मध्यरात्रीच्या सुमारास सागरने आपल्या शर्टच्या सहाय्याने गळफास घेऊन आत्महत्या केली. आज सकाळी 7 च्या सुमारास ही घटना उघडकीस आल्याने पोलीस ठाण्यात एकच खळबळ उडाली आहे. शहर पोलिसांच्या वरिष्ठ अधिकाऱ्यांसह जिल्हा सामान्य रुग्णालयाचे डॉक्टर तसेच सीआईडीचे अधीक्षक अमोल गावकर यांनी घटनास्थळी भेट देऊन पाहणी केली. घटनेचा पुढील तपास सुरू आहे.

Edited By : Krushnarav Sathe